Shillong, ïaïong, 27: Ka Meghalaya Residents Safety and Security (Amendment) Bill 2020 mynta ka la don ha ka miej jong u President ka ri u Ram Nath Govind na ka bynta ban ai jingmynjur khnang ban pynlong aiñ ïa kane ka aiñ-rew ka ban tehlakam bad pyrkhing ïa ka rung ka mih laitluid jong ki briew kiba wan nabar shapoh ka Jylla Meghalaya
Ïa kane la pyntip da u Myntri Rangbah ka Jylla u Conrad Kongkal Sangma ha ka jingïakren bad ki lad pathai khubor ha ka sngi Balang.
“Hadien ba la mynjur ïa ka Meghalaya Residents Safety and Security (Amendment) Bill 2020 (da ka Ingdorbar Thawaiñ ka Jylla), u Lat ka Jylla u la bishar sani bha ïa kane ka kam bad ka Ministry of Home Affairs (MHA). Namarkata, katkum ka jingai jingmut jong u Lat uba rim (Tathagata Roy), la pynphai biang sha ngi ïa ka aiñ-rew (Bill) namarba ngi la phah biang sha u Lat. U Lat uba thymmai (Satya Pal Malik) sa shisien, katkum ka jingkynthoh jong u Lat uba rim uba ong ba ïa kane ka aiñ-rew dei ban phah sha u President ka ri na ka bynta ban ai jingmynjur,” u la ong.
“Ka File mynta bad ka aiñ-rew (MRSSA Bill) la phah mynta sha ka Ophis u President ka ri,” la bynrap u Conrad.
