Ha Mendipathar yn tei ïa ka Pepsico Plant ban pynmih umsoh, yn ïohkam palat 500 ngut ki samla trai ri

Shillong, Naitung, 19: Ka kynhun Myntri jong ka Sorkar Jylla ha ka sngi Thohdieng ka la mynjur ïa ka jingtyrwa ban tei ïa ka Pepsico plant, ka projek kaba kot palat 300 klur ha Mendipathar Industrial Area ha North Garo Hills District. Da ka jingtei ïa kane ka karkhana palat 500 ngut ki nongshong shnong ka North Garo Hills kin ïohkam.
Ha ka jingïakren bad ki lad pathai khubor, u Myntri Rangbah ka Jylla u Conrad K. Sangma u la ïathuh ba ïa kane ka projek la tyrwa da ka Varun Beverages Limited, ka kompeni kaba pynïaid ïa ka Pepsico plant.
“Kane ka dei ka jingtyrwa kaba kot T. 200 klur ban shna ïa ka karkhana ban pynmih ïa ki mar Pepsi bad ka jingbei tyngka kaba kham kot T.100 klur ha kaba ïadei bad jingpynmih ïa ka umsoh ha kajuh ka jaka. Kane ka dei ka jingtyrwa kaba kot kot T. 300 klur. Ïa kane ka karkhana la tyrwa ban buh ha Mendipathar Industrial Area, North Garo Hills bad ka rai jong ka kynhun Myntri ka long ban mynjur ïa ki jingai jingkyrshan ba la buh kyrpang katkum ka Meghalaya Industrial Policy, 2024, ngi don ki kyndon ba dei ban bei tyngka palat T.100 klur, ki katto katne ki jingai jingkyrshan ba kyrpang ki lah ban long bad kane ka ïahap biang bad kaei kaba kiwei pat ki Sorkar jylla ki la leh,” u la ong.
“Kumta halor kane, ngi la rai ban kyrshan ïa kane ka jingpynshlur ba la pynbeit kyrpang katkum ka polisi jong ka Sorkar Jylla bad ha kane ka pisa kaba kot haduh 30% kham bun ka jingïarap ïa ki jingbei tyngka kaba ki la pan palat ïa ka pisa kaba ju ai, kawei pat ka pisa ba la pyndap kaba 30% tam la pyndap ïa kata ka jingai jingïarap pisa. Kumta ka T.7.5 klur ka dei ka jingai jingïarap pisa bad la tyrwa ban pyndap T.5 klur ha kaba ka jingdawa na ka kompeni ka long kumba jan haduh T.40 klur ka jingbei tyngka, ki la pan ïa ka jingbei tyngka, hynrei la pynduna sha ka T.5 klur,” la bynrap u Sangma.
Haba pynpaw ba ka Sorkar ka la mynjur ban ai 2% ka jingïarap kum ka sut, u Myntri Rangbah u la ong, “ha kajuh ka por ka pisa GST kaba don hangta kaba thikna ka don ka jingsiew biang ïa ka GST biang ka ïahap bad ka skhim UNNATI bad kumjuh ruh bad ki skhim na kiwei pat ki Sorkar Jylla ha kaba la pan ïa ka jingsiew bailutksan kumba 300%. Ngi la pynduna ïa kata bad ngi la mynjur ïa ka jingbei tyngka ne jingphah biang kaba 200% na ka jingshah oh khajna SGST kaba jia, ha kiwei pat ki jylla ka jingbun ka kiew haduh wat 300%, kumta ngi la pynhiar ïa ka haduh 200%.”
Shuh shuh, u Myntri Rangbah u la pyntip ba ka Sorkar ka la buh ïa ka kyndon ba 90% ki nongtrei ki bym dei ki nongpynïaid ki hap ban dei ki nongshong shnong.
“Bad na ka bynta ki nongpynïaid, hapoh ki ar snem ban wan, kin hap ban don tang khyndiat eh 50% ki nongtrei ruh kin dei na ka jylla, ka ban sdang naduh 25% ha ki ar snem ba nyngkong hynrei hadien ar snem sa 50% ki nongtrei ruh kin dei ki trai jylla.,” u la ong bad bynrap, “kumta kine ki dei ki kyndon kiba la buh da ka sorkar jylla bad kumjuh ruh kumba nga la ong ka kyndon ba ka karkhana ka dei ban kyrshan ïa ki mar rep jong ka thaiñ bad kiwei kiwei ki marrep ban ïarap ki nongrep.”
Haba kylli, u Myntri Rangbah u la ong ba la khmihlynti ba kane ka karkhana kan pynmyntoi ym duna ïa ka 500 tylli ki lad kamai ba beit bad bym beit na ka bynta ki briew kiba na ka thaiñ.”