New Delhi, ïaïong, 26: Ka Cabinet Committee on Economic Affairs (CCoEA) ba la pynïaid da u Myntri Rangbahduh ka ri u Narendra Modi ka la mynjur ïa ka jingplie 157 tylli ki Nursing College ba thymmai ha ki jaka ba don lang bad ki Medical College ba la don lypa ba la plie naduh u snem 2014.
Da kane ka jingai jingmynjur yn pynmih 15,700 ngut ki samla ba pas Nursing manla u snem. Kane kan pynthikna shuh shuh ka jingpule Nursing kaba bha, ba jemdor bad kaba ryntih ha ka ri, khamtam ha ki distrik kiba dang duna ïoh jingshakri bad ki Jylla/ Union Territory. Ka jinglut na ka bynta kane kan long T. 1,570 klur.
Ha Meghalaya, la ai jingmynjur ban plie ïa ka Nursing College ha Tura, West Garo Hills.
Kane ka sienjam ka thmu ban weng ïa ki jingbym ryntih ha ki jaka nongkyndong- jaka sor ha kaba ïadei bad ki kam ai jingsumar, kaba la ïalam sha ka jingduna ki nurse ha ki katto katne ki jaka bad ktah ïa ki kam ai jingsumar ha ki jaka kiba dang duna ïoh jingshakri. Ka jingplie ïa kine ki nursing college kan kyntiew ka jingdon ki briew kiba la ïoh jinghikai pyntbit ha ki kam ai jingsumar. Ïa kane la leh ruh kum shi bynta ka jingkut jingmut ha ka ri na ka bynta ka Universal Health Care (UHC) bad kan ïarap ban kot sha ki thong Sustainable Development Goals (SDG). La peit ruh ïa ki jingpynkylla ka rukom long ki kyndon na ka bynta ka jingpule nursing ban pynbiang ïa ki jingdonkam kiba mih ha kane ka kam.
Ka National Skill Development Corporation (NSDC) ruh ka la ïatreilang bad ki agency nabar ri bad na ka ri na ka bynta ban kyntiew ïa ki sap treikam bad ban pynïoh kam ïa ki nurse kiba ladep pyntbit shabar ri.
Ka jingdon lang jong kine ki Medical College bad ki Medical College ba la don lypa kan plie lad ban pyndonkam ïa ki jingdon jingem ba la don lypa, ki skill labs, ki lad clinical bad ki nonghikai. La khmih lynti ba kane ka sienjam kan ai ka jingïoh ïa ki kam clinical sha ki samla pule nurse bad kan pynïoh ka jingsumar kaba bha ïa ki nongpang ha ki medical college. Yn peit ïa ka jingpyndonkam ïa ki green teknoloji ha kine ki nursing college bad yn pdiang katkum ka jingïahap ban pynthikna ka bording kaba biang bad ka jingduna ka jingpyllait carbon.
Ka Sorkar ka thmu ban pyndep ïa ka projek hapoh ki ar snem ban wan bad ka la buh por ïa man ka bynta jong ka jingsaindur kumjuh ruh ka jingpyntreikam ïa ka projek. Ka Empowered Committee ba la khlieh da u Union Health Secretary ha ka sorkar pdeng bad Principal Secretary, Health/Medical Education ha ki Jylla kan peitngor ïa ka jingïaid shaphrang ka kam. Ki Sorkar Jylla/UT kin ai jingtip man ka por sha ka MoHFW, shaphang ka jingïaid shaphrang ki kam ban plie ïa ki Nursing College ba thymmai hapoh ka skhim.
