Tikrikilla, Rymphang 01: U Myntri Rangbah ka jylla u Conrad K Sangma ha ka sngi Balang u la hiar sha Tikrikilla ka ktem ha ki bynta rithor jong ka Garo Hills kaba u Dr Mukul Sangma u la pynkhreh ban aireng ha kane ka elekshon ban sa long ha ka 27 Rymphang.
Kane ka jinghiar ïalap elekshon jong u Conrad ka long hdien ba u Mukul u la hiar ba ïalap elekshon ha kane ka constituency.
Haba kren ha kane ka sngi u Conrad u la kop ba ka NPP kan thaw rekod ha kane ka elekshon kaba mynta kumba ka APHLC ka la lah ban thaw ha u 1972.
“Kumba ka APHLC ka la lah ban synshar marwei ha u snem 1972 hapoh ka jingïalam u Captain Williamson A Sangma ka NPP mynta ka kynti kan kot sha kane ka kyrdan,” u la ong.
U la ong ruh ba na ka liang ka NPP kaba la ïalam ïa sorkar ka la leh shibun bah ki kam na bynta u paidbah ym kum ka TMC kaba heh tang ka ktien.
“Ngi la sdang ban ai jingkyrshan pisa sha ki nongrep lyngba ka Focus bad Focus Plus bad kane ka jingkyrhsan ngi la pyni da ka kam hynrei kito kiba kular ban kyrshan pisa ïa ki samla bad ki kynthei ki leh aiu mynba ki dang bat ïa u lakam synshar ka jylla,” u la ong.
“U Mukul bad ka TMC ki ïoh buit na ngi ban ai jingkyrkyrshan pisa ïa ki longïing bad mynta ka la shu pyrthuh tuta moina na kaei kaba ngi la sdang hynrei nga kwah ban kyllu balei u Mukul Sangma u kren ïa kata ka Women Empowerment ne WE tang ynda la poi ka elekshon hynrei u leh aiu yna u long Myntri Rangbah 8 snem,” u la bynrap.
