Ha ka sngi rakhe pyrshah ïa u Drok ha Mawkyrwat la pyllait paidbah ïa ka phlim “Shu Maad”

Mawkyrwat, Jylliew 26: Ka ophis treikam jong ka District Legal Services Authority (DLSA), South West Khasi Hills District, ha ryngkat ka jingïatreilang bad ka ophis jong u District Social Welfare Officer, South West Khasi Hills District, mynta ka sngi ka 26 tarik u Jylliew, 2026, ki la rakhe ïa ka International Day Against Drug Abuse & Illicit Trafficking 2026 halor ka phang, “World Drug Problem: Persisting Issues, New Challenges, Innovative Responses”, ha District & Sessions Judge Court Complex, Mawkyrwat.
Ha kane ka prokram la wan ban sakhi lang da u Bah Banraplang Jyrwa, MPS, Superintendent of Police, South West Khasi Hills District, bad u Bah L.G.M. Kharmih, MCS, Additional Deputy Commissioner, South West Khasi Hills District kum ki kongsan. La donlang ruh ka Kong C. Dkhar, MHJS, District & Sessions Judge-cum-Chairperson, District Legal Services Authority, South West Khasi Hills District, ka Kong B. Majaw, MJS, Chief Judicial Magistrate-cum-Secretary, District Legal Services Authority, South West Khasi Hills District, ryngkat bad ki ophisar, ki nonghikai, ki khynnah skul bad ki paidbah.
Ha ka jingai jingkren jong ki, ki la ban jur halor ka jingdonkam jong ka jingïatreilang hapdeng ki tnad Sorkar, ki shnong, ki longïing bad ka imlang sahlang ban ïakhun pyrshah ïa ka jingkyrni ha u drok bad ïa ka khaïi be-aiñ ïa u. Ki la ong ruh ba tang da ka jingïatreilang, bad ka jingpynsngewthuh ïa ki paidbah, ka lah ban tei ïa ka imlang sahlang kaba lait na u drok bad kaba shngaiñ hynrei donkam ruh ka jingrai kut jong baroh ban ïeng tylli kawei.
Ki la kdew ruh ba ka long kaba donkam ïa uwei pa uwei u nongshong shnong ban shim ïa ka jingkitkhlieh ha kaba ai jingtip bad pynsngewthuh halor ki jingma kiba mih na u drok, da kaba sdang nyngkong eh na la ïing, ki shnong ki thaw, ka imlang sahlang bad ka ri ka jaidbynriew. Ym tangkata, ki la ai jingtip ruh ba na ka liang ka aiñ ruh ka don ka la jong ka bynta jong ka jingtreikam lada lap ne ïoh kem ïa ki briew kiba dih ne khamtam eh ïa kito ki briew kiba mlien ha ka kam khaïi.
Ha ka jingkren ai jingmut sha ki khynnah skul, ki la kyntu ïa ki ba kin long ki nuksa kiba bha lyngba ka jingminot ha ki jingpule, ki jingïalehkai sports bad kiwei pat ki kam kiba tei ïa ka lawei jong ki. Ki la pynkynmaw ruh ba ki dei ban kiar na kino kino ki jingmlien kiba sniew kiba lah ban ktah bad pynjot ïa ka jingim bad ka jingïaid lynti jong ki na ka bynta ka lawei ban pynphyrnai ïa lade.
Ha kane ka sngi ruh, u Bah L.G.M. Kharmih, MCS, Additional Deputy Commissioner, South West Khasi Hills District, u la pyllait paidbah ïa ka phlim lyngkot kaba la ai kyrteng “SHU MAAD”, kaba thmu ban pynsngewthuh ïa ki paidbah, khamtam ïa ki samla, halor ki jingma kiba mih na ka jingdih bad ka jingpyndonkam ïa u drok. Kane ka phlim ka pyni ruh kumno ka jingmlien kaba sdang na ki kam kiba rit ka lah ban lam sha ki jingeh kiba khraw bad kiba pynjulor ïa ka jingim.
Ha ka bynta ba ar jong ka prokram, la pynlong ïa ka Technical Session, ha kaba ka Kong W. Lyngkhoi, Adolescent Counselor, District Medical & Health Office, South West Khasi Hills District, ka la ai jingkren halor, ka Effects of drugs on Adolescent Health and well-being” ne “Ki jingktah jong u drok ha ka koit ka khiah bad ka jingim jong ki samla”.
Kiwei de ki prokram ha kane ka sngi ki long ka jingrwai kyrpang da ki khynnah pule jong ka Mawpud Secondary School, Mawpud, bad ka jingpyni ïa ka phlim kaba la ai kyrteng “SHU MAAD,” kaba la ai ka khubor ne jingpynsngewthuh kaba don jingmut shaphang ki jingma bad ki jingktah ba sniew jong ka jingdih drok.
La pynïaid ïa ka prokram da ka Kong Nosmi Hahshah, CLADC, District Legal Services Authority (DLSA), South West Khasi Hills District, ïa ka jingkren pdiang sngewbha la ai da u Bah E. Tariang, District Social Welfare Officer, South West Khasi Hills District, katba ïa ka jingkren ai khublei la ai da ka Kong Queency Kharmawlong, CLADC, District Legal Services Authority (DLSA), South West Khasi Hills District.