Jowai, Jylliew 26: Ka Shkenpyrsit kaba hap hapoh ka Amlarem Sub-Division ka dei kawei na ki jaka jngohkai pyrthei kaba pawnam bha da ka jingdon ïa ka wah Phe Phe bad hynnin ka sngi la pynkup burom da kaba sam ïaki syrnot sha ki 30 ngut tam ki samla na Shkenpyrsit bad na ki shnong ba marjan, kiba la pyndep hok ïa ka jingshah hikai halor ka Agritourism na ka Society for Urban and Rural Empowerment (SURE).
Ïa kane ka prokram la hikai kyrpang ïa kitei ki samla trai shnong ba kin sngewthuh kumno ban kyntiew ïa kam jngohkai pyrthei bad ban taw ki lad ki lynti ban kamai jakpoh na kane ka kam.
Na ka liang ka kongsan kong V. Kezo, IAS, SDO (Civil), Amlarem Sub-Division haba ai jingkren kala ai khublei ïa ki nongshah hikai kiba la pyndep hok ïa kane ka prokram. Ka la pynkynmaw ba kim dei ban long tang ki tourist guide hynrei ki long ruh ki nongkit khubor jong ki shnong bad ïa ka jylla.
Shuh shuh ka la pynpaw ka jingkyrmen ba ka Amlarem Subdivision kan long kawei na ki jaka jngohkai pyrthei ba kongsan jong ka Jylla Meghalaya bad kaba plie lad haka liang ka ïohkam ïohjam naka bynta ki samla ka thaiñ.
U H.H. Mohrmen, Secretary jong ka SURE, ula pynpaw ka jingkyrmen ba ka kam jngohkai kan kyntip ïa ka imlang sahlang, ka ïoh ka kot jong ka thaiñ hi baroh kawei, Ula ban jur ba ka Agritourism ka don ka lad ban pynmih pisa bad la pynshlur ïa ki paidbah ban pynneh pynsah ïa kolshor tynrai.
