Nongstoiñ, Nailur 18: Na ka bynta ban pynkhlaiñ ïa ka party ha West Khasi Hills, ka Bharatya Janata Party ha kine ki sngi ka la sdang shait shait ban pynrung dkhot thymmai da kaba sdang na Nongstoiñ.
U bah Spastarlin Nongrem President ka BJP West Khasi Hills haba pyntip ha u nongthoh khubor, u la ong ba ka jingrung dkhot thymmai hapoh Nongstoiñ constituency ka la sdang naduh ka sngi hatmajai ka 17 tarik Nailur.
Ka jingsdang ban pynrung dkhot ha katei ka sngi, ka dei ruh kum shi bynta jong ka jingrakhe ïa ka lyngkhuh sngi kha kaba hynñiewphew san jong u Narendra Modi u ba dei u Myntri Rangbahduh ka ri.
Ha katei ka sngi la pynlong ïa ka jingpynrung dkhot sha ka party ha kawei na ki hall ha Upper New Nongstoiñ, ha kaba ki rangbah, ki longkmie bad ki samla kiba kwah ban rung sha ka BJP ki la ïapoi lang khrui.
Nalor kata ki nongïalam ba hakhlieh duh jong ka BJP Meghalaya ba kynthup ïa u bah A.L.Hek Myntri ka sorkar jylla, u bah David Kharsati, ki nongïalam jong ka Mahila bad kiwei kiwei ki la ïadon lang ha katei ka sngi.
Nalor kata kum ka dak jong ka jingleh kmen jong ka BJP West Khasi Hills ïa katei ka sngi kha jong u Myntri Rangbah duh ka ri, ka party ka la pynkhreh da u cake ha kaba u bah A.L Hek nongïalam ba hakhlieh duh jong ka BJP Meghalaya u la ot ïa utei u cake.
U bah Nongrem u la ong ruh ba ha kane ka sngi balang ka 18 tarik Nailur, ki nongïalam ka BJP West Khasi hills ki la hiar sha Rambrai ban pynlong jingïalang bad pynrung dkhot na ka bynta ka Rambrai Jyrngam constituency.Ha katei ka sngi la ïoh ban pynrung dkhot thymmai palat sanphew ngut ki nongshong shnong ka thaiñ Rambrai. U la ong ruh ba na ka liang ki nongïalam ka BJP West Khasi Hills kin sa leit ban pynrung dkhot ha man la ki jaka, na ka bynta ban pynkhlaiñ shuh shuh ïa ka jingtrei kam hapoh ka district.
U la ong ruh ba ka party ka pdiang kylluid ïa baroh kiba kwah ban pynrung kyrteng la ka dei ïa ki rangbah, ki longkmie bad ki samla kiba la dap khatphra snem shaneng.
