Ha ka sien kaba saw pyllait u MLA ka Mawkyrwat ïa ki skhim kaba kot 3 klur tam

Mawkyrwat, ‘Naiwieng, 11: U bah Renikton Lyngdoh Tongkhar, MLA ka HSPDP na ka Mawkyrwat Constituency bad uba bat ruh kum u Myntri jong ka tnad umbam umdih ka sorkar Meghalaya u la ïoh ban pyllait paidbah ïa ka MLA Scheme jong u snem 2021-2022 ha kaba ka mang tyngka kaba la kot haduh T. 3,39,02,605/- klur tyngka ha ka jingïalang ba la pynlong ha phyllaw ka ophis treikam jong u Nongmihkhmat.
Ki skhim ba la pyllait paidbah mynta ka sngi ki long baroh 73 tylli ki jaid skhim kata ha ka Special Rural Works Programme (SRWP) ka kynthup ïa ki 63 tylli kaba T. 2 klur shiteng, ha ka Chief Minister’s Special Development Fund (CMSDF) ka kynthup ïa ki 5 tylli kaba T. 81 lak tyngka, na ka Intensive Art’s & Culture Development Programme (IACDP) ka kynthup ïa ki 3 tylli kaba T. 2 lak shiteng, na ka Development of Traditional Folk Musics (DTFM) kawei kaba T. 2 lak shiteng bad ka Intensive Sports & Youth Development Programme (ISYDP) kawei kaba T. 2 lak shiteng bad kine ki dei jong u snem 2021-2022.
U bah Renikton Lyngdoh Tongkhar, MLA ka Mawkyrwat Constituency haba kren ha ka jingïalang u la pynpaw ka jingsngewkmen ban ïoh biang ïa kane ka lad sa sien ban ïoh ban pyllait paidbah ïa ki kam pynroi kiba dei na ka MLA Scheme jong u snem 2021-2022 kiba don haduh 73 tylli ki jait skhim kiba long lyngba ka jingïatreilang bad ka ophis u Block Development Officer (BDO), jong ka Mawkyrwat C&RD Block. “Ïa kine ki skhim la ïoh ban pyllait paidbah ha ba shit ba shai khlem da don kano kano ka jingbuh rieh”, ong u bah Renik.
Haba phai ha ka jingpyllait ïa ka MLA skhim jong u snem 2018-2019 kiba bun ka leit sha ki nongrep, ha snem 2019-2020 pat sha ki samla pule ba kumno ki samla pule kin nang ïai im sngi ban pynleit jingmut ha ka pule puthi, ha u snem 2020-2021 kane ka skhim ka leit kham bun sha ki nongri jingri bad mynta u snem 2021-2022 ka kham leit sha ki skhim kiba ïa dei bad ki jingtei ne construction ha ki shnong bapher bapher katkum ki jingdonkam ba na ka liang ki nongïalam shnong bad ki ‘riew rangbah ki la pan jingïarap kata naduh ka jingshna ïa ki lynti, ki surok, ban shna ïa ki jingtei ha ki skul pule bad kiwei de ki jingtei, u la ong.
Kumta u la buh ka jingkyrpad na ka bynta kito ki shnong bad ki ‘riew shimet ki bym ïoh mynta ka kynti ba kin long kiba ïai shah bad ïai ap ha kaba ha kawei pat ka por kin sa ïoh bynta na ka jingmang lyngba ka MLA Scheme kaba ynsa pyllait shen kaba dei jong u snem 2022-2023. Namarkata, u la ong ba ban ïoh leh kham kloi ïa ki jingdonkam jong u paidbah, ka donkam ïa ka jingkyrshan lang na ka ophis jong ka Deputy Commissioner, ka ophis jong ka Mawkyrwat People’s Development Association (MPDA), ka ophis jong u MLA bad kumjuh ruh ka ophis jong u Block Development Officer.
Namarkata, ula kyntu ïa ki paidbah ki ban ïoh bynta lyngba kane ka MLA Scheme ba kin da pyndonkam hok ïa ka khlem kano kano ka jingleh ar sap kumba ma u la dep ban pyllait haba sakhi bad ïoh lang da baroh ki paidbah bad ymdei ban shu pynlehnoh ei kai ïa ka pisa, khnang ba kin long ki jingmyntoi ïa ki paidbah nongshong shnong namar da ka jingpyntreikam hok ïa ki bhah ne ki bynta ba la ai kan sa long ka jingkyrkhu ïa kiba bun. Kumta u la ai ka jingkitbok kitrwiang na ka bynta baroh ki nongïoh bynta na kane ka skhim ba kin long kiba ïatreilang ha ki bynta baroh khnang ba ki kam pynroi hapoh ka dong ka thaiñ kin ïaid beit ïaid ryntih.
Ha kawei pat ka liang u bah Renikton Lyngdoh Tongkhar u la ong ba mynta ka sngi ka don ruh ka jingsam pyndep ïa ka jingïarap kaba dang sah jong u snem 2020-2021 ha kaba ki 145 tylli ki longïing kin sa ïoh ïa ka bhah ba la mang.
U Block Development Officer (BDO), ka Mawkyrwat C&RD Block, u bah I. Lawrynñiang, MCS ha ka jingkren jong u u la ong ba watla kam dei ka bynta ban pynpaw ïa ki lai tylli ki bynta hynrei kum ka jingpynshlur ïa ki paidbah ba kan long ka jingmyntoi ïa ki hi u la kyntu ba ki dei ban don la ki jong ki jong ki Account Number ha ki jaka pynlang pisa khnang ban pynsuk ïa ki rukom pyntreikam ïa ki skhim sorkar, kawei pat ka long ba kim dei ban sheptieng ban shon ïa u Adhaar namar u long u ba donkam bad kumjuh ruh u la pynshlur ïa ki nongtreikam la jong ne ki nongtrei ha ki MGNREGA ba kin pynrung kyrteng ïa lade hapoh ka E-Shram khnang ba kan long ka jingmyntoi.
Ha kane ka sngi la ïadonlang u bah Donbok Kharjahrin, Secretary ka Mawkyrwat People’s Development Association (MPDA) uba la ai jingkren lem bad ki paidbah na kylleng ki shnong jong ka Mawkyrwat Constituency.