Ha ka NPP ngi don para ma ngi, kaba ïalam da ma ngi na ka bynta jong ngi
Ka jaidbynriew jong ngi kam dei kaba mane ïa ki nongïalam
Shillong, Rymphang 17 : Ka nongaiktien jong ka National People’s Party (NPP), ka Dr M. Ampareen Lyngdoh ka la ong ba ka jingitynnat ha kane ka election ka long ba kiwei ki seng ki don ïa kita ki heh nongïalap election, katba ka NPP kaba dei ruh ka national party na kane ka Jylla ki don para maki ban ïakren ban pynsngewthuh bad ki paidbah.
“Ka jaidbynriew jong ngi kam dei kaba mane ïa ki nongïalam, ngi dei ka jaidbynriew ba ngeit ba sngap bad ba burom ïa ki nongïalam, hynrei ngim ju mane ne beh kum ki biej,” ka la ong.
Ha kaba ïadei bad ka jingwanrah kiwei ki national party ïa ki nongïalap election ba pawnam, ka nongïalam ka NPP ka long ba ka daw bah ba ki 8 ngut ki MLA jong kiwei ki party ki la leit ban rung sha ka NPP kadei ban pynkhlain ïa ka seng kaba dei na kane ka Jylla.
“Ngi shane ngi tip ba ki paidbah ka Jylla ki bud nongïalam, kim bud party namar kim don kita ki briew ba la shah pynbaptis ha kato ka seng,” ka la ong.
“Kita ki political party ki la wan ïalam lut ïa kita ki actor actress ban wan ïa tabaiñ lut sha kane ka Jylla, ha ka NPP ngi don para ma ngi, kaba ïalam da ma ngi na ka bynta jong ngi,” ong ka Kong Ampareen bad kyntu ruh ïa ki paidbah ba kim dei ban biej shuh.
“Ngam tharai ki paidbah ha Shillong kiba biej actor actress haduh katta,” ka la ong.
Ha kaba ïadei bad ki heh Sorkar na Delhi kiba la wan ban ïalap election sha kane ka Jylla ka la ong, “Uei ban dang nud tur shuh hangto namar tang ki nongpahara ruh kaba ishyrkhei, bad tang ban poi sha jan jong ki ruh kaba eh.”
“Nga lah don ha ka seng Congress katto ban ïakynduh kaba jynjar, ka jingsngew duhnong ïa ka por lajong,” ka la ong.
Ha kajuh ka por ka Kong Ampareen ka la ong ba ka jingwan ïalam ïa ki actor actress bad ïa ki nongïalam election na shabar kadei ka jingpynlut na ki party ïa kiba hap ban ai jingkheiñ.
“Ka election kadei kaba ïakhun para ma ngi, hangne ngi ïashong para ma ngi bad ka election ruh kadei na ka bynta jong ngi, nga sngew kam long kaba donkam ban wan ki briew kiba na shabar,” la ong ka nongïalam jong ka NPP.