Amit Shah phi kren ïa ka ‘Beti Bachao Beti Padao’ hynrei phi ai tiket ïa u nongpynïaid ktem awria: Alka Lamba

By Mawphor News Desk On Feb 18, 2023

Shillong, Rymphang, 17: Ka National Spokesperson jong ka seng Congress ka Alka Lamba ha ka sngi Thohdieng ka la thalaiñ tyngeh ïa ki nongïalam bahakhmat jong ka BJP bad ïa u Myntri ka tnat Kam Pohing u Amit Shah uba la kynnoh ba ka Meghalaya ka dei ka jylla kaba jur bha ha ka bamsap ha ka ri bad ha kajuh ka por ka la buh jingkylli ruh ïa ka rai jong ka partyban ai tiket ïa u MDC ka Tura u MDC Bernard N. Marak, uba la shah kem halor ka jingkynnoh ba u la pynïaid ïa ka ktem awria, ban ïakhun ïa ka elekshon na South Tura.
“Nga kwah ban ong ïa u Amit Shah ka Meghalaya ka dei kaba bamsap. Ka Sorkar jong ka Meghalaya kaba phi ïatreilang ka dei kaba bamsap,” ong ka Lamba ha ka jingïakren bad ki lad pathai khubor.
Haba kdew ïa ka case ba la mudui pyrshah ïa u Marak, ka Lamba ka la ong, “ki kynthei bad ki khynnah ha Meghalaya ki kwah ban tip haba phi kam ba phin ïada ïa ki kynthei bad phi kren shaphang ka ‘Beti Bachao Beti Padao’ hynrei phi ai tiket sha u briew uba la shah pyngngat ha ka POSCO. U briew uba la bna nam ba u pynïaid ïa ka ktem awria ha Meghalaya bad phet rieh sha Uttar Pradesh, uba la shah kem bad shah set along. Ha ka jaka ban weng ïa u na ka party phi ai khusnam pynban da kaba ai tiket ban ïakhun na ka BJP.”
“U Myntri Rangbahduh ka ri u dei ban ai ka jubab kumno phi lah ban kam ba phin ai jingïada ïa ki kynthei haba phi wanrah kum ïa kine ki jait briew kiba khñoit beiñ ïa ki kynthei bad ban long u nongmihkhmat jong ki paidbah ka Meghalaya? U Modi, u Shah, ka Irani ki dei ban ai jubab sha ki paidbah ka Meghalaya, sha ki kynthei ka Meghalaya, sha ki khynnah kynthei ka Meghalaya,” la bynrap ka Lamba.
Haba pynpaw ba ka MDA ka la long ka ‘Meghalaya Damaging Alliance’, ka Nongaiktien jong ka AICC ka la ong, “katto katne ki party ki khwan myntoi bad ki khynñiat ïa ka jylla na kaba wanrah ïa ki kam pynroi sha ka jingpynjot.”
Ka la thalaiñ ïa ka MDA halor ki jyrsieh bamsap ba bun jait ba kynthup ïa ka jingtwa u tnum pyllun ka Assembly, ka bamsap na ka COVID-19 kaba kot 816 klur, ka bamsap na ka MUDA kaba kot T. 500 MUDA scam, ka bamsap na ka Saubhagya kaba kot Rs 149 klur bad kiwei kiwei.
Da kaba pynpaw ba ka NITI Aayog Multidimensional Poverty Index (MPI) ka lap ba ka Meghalaya ka dei kawei napdeng ki jylla kaba duk tam ha ka ri, ka la ong, “ka don ha ka kyrdan kaba san ha ka jingduk ha ka ri bad kaba duk tam ha ka thaiñ Shatei Lammihngi jong ka ri. Ka MPI ka kynthup ïa ki tnat bapher bapher kum ka koit ka khiah, ka pule puthi bad ka ïoh ka kot kaba noh synñiang sha ka jingim jong ki paidbah. Ka jingbym ïohkam ka jur bha ha ka jylla bad kane ka mat ka dei ka la lam sha ka jingjyllei jong u drok hapdeng ki samla ha ka ri.”
Shuh shuh ka la kynnoh ba ka sorkar BJP ka la nang pynjur ïa ka jingïap thngan ha ka ri kumba ka India mynta ka don ha ka kyrdan kaba 107 napdeng ki 121 tyllli ki ri. Ka India ka don ha ka kyrdan kaba kham hapoh jong ka Sri Lanka (64), ka Nepal (81), ka Bangladesh (84) bad ka Pakistan (99). “Ka BJP ka kam ba ki dei ki sorkar ar enjin hynrei ha ka jingshisha ki dei pynban ki sorkar thaw jingkulmar. Ka jingkulmar ka dei ka jingbym ïohkam bad ka jingkiewdor jong ki marbam,” ka la bynrap.
Ka la ong ba ki paidbah ki kwah ïa ka jingkylla. “Ha ka jingleit dang shen sha Tripura hadien ka jingpynlut por haduh 7 bad ïashim bynta ha kiba bun ki jingïalang, ki paidbah ki kwah ïa ka jingkylla kum ka Himachal,” ka la ong.
“Ka NPP kaba ïalam ïa ka Sorkar MDA bad ka BJP ki dei ban ai jubab sha ki paidbah ka Meghalaya halor ka jingkiew ki bym ïohkam ïohjam hapdeng ki samla jong ka Meghalaya. Ka Manifesto jong ka NPP bad ka BJP na ka bynta u snem 2023 ki la kular ban ai kam sha ki samla hynrei kaei pat kaba ki la lah ha ki san snem ba la leit noh? la buh jingkylli ka Lamba.
“Ki paidbah jong ka jylla Meghalaya ki dei ban kynmaw ba ka BJP bad ka NPP ki la shu kular lamler ïa kaba kim lah satia ban pynkha ïa ki lad ïohkam ha ki san snem baladep kumba ki la kular ha ki Manifesto barim, kin ym lah satia ban pynurlong ïa ka jingkular wat ha ka Manifesto kaba thymmai,” la kynthoh kane ka nongïalam jong ka AICC.