Ha ka mang tyngka T24.160 klur tyngka yn maramot ïa ka surok RBBJ ha East Jaiñtia Hills

Khliehriat Risaw 19: La khmih lynti ba ha u bnai naiwieng jong une u snem 2022 yn plie noh ïa u maw nongrim ha ka shnong khappud ha East Jaiñtia Hills District na ka bynta ban sdang noh ïa ka jingmaramot ïa ka surok Rymbai-Bataw- Borghat-Jalalpur (RBBJ-Road) kaba la jot rathai kaba shu iennoh khlem maramot la bun-bun snem.
Katkum ka kaiphot ba la pyllait da ka Ministry of Road Transport jong ka sorkar India (Zone North East) la pynpaw ba ïa ka mang tyngka kaba T24.160 klur tyngka la pynllait lyngba ka Central Road Infrastructure Fund (CRIF) kaba la mang na ka bynta ban maramot ïa katei ka surok ha ki thaiñ khappud kiba don hapoh East Jaiñtia Hills District haduh 30 kilo mitar.
U myntri ka sorkar jylla, uba dei ruh u MLA ka thaiñ, u bah Kyrmen Shylla, ha ka jingïalang ba la pynlong myn ha ka 14 tarik mynta u bnai, ha shnong Bataw u la ong ba hapoh kine ki saw snem tam, ki paidbah jong kane ka thaiñ ki la ju pynpaw ki jingeh namar ka jingsniew palat ka surok bad ki la kyntu ïa u kum u nongmihkhmat ba un ïarap lem ban wad ki lad ki lynti ban ïoh ban maramot bha ïa kane ka surok
“Ha ka jingïaid lynti ki ju don ki por ba duh mynsiem, tangba nga ngeit ba ngan ïoh ka lad ban ïarap bad nga ju ong ruh ïa ki paidbah ba kin long kiba ïai shah bad mynta sngewtynnad ban pynbna ba ha ka 4 tarik jong u bnai naiwieng 2022 ngin plie noh ïa u maw nongrim jong kane ka surok, ki jingpynkhreh ki dang ïaid sha khmat bad tang shu ïoh ïa ki contractor ki ba shna surok yn sdang noh ban shna ïa kane ka surok bad ynda la dep maramot bad shna bha ïa ka surok kan ïarap bad pynsuk shibun ïa ki paidbah ha ka leit ka wan”
La khmih lynti ba ka jingmaramot ïa kane ka surok RBBJ-Road kan ïarap bad pynsuk ruh ïa ki nongrep jong ka thaiñ ba kin pynpoi ïa ki mar rep jong ki sha ki jaka ïew bad kumjuh ruh kan ïarap ïa kiba pang ba shitom bad la khmihlynti ruh ba ki contractor kiba pyntrei ïa katei ka surok kin trei bha ba ka surok kan long kaba skhem bad kaba bha ka ban neh slem.