Ha ka jingiphuh iphieng rakhe ka Sngap Syiem College ïa ka jingdap 40 snem

Mawkyrwat, Ïaïong, 11: Ka Sngap Syiem College, Mawkyrwat ha ka sngi Thohdieng ka la rakhe ïa ka jingdap 40 snem ka jingïaid lynti ha kaba ïa dei bad ka jingai jingshakri ha ka liang ka pule puthi na ka bynta ki samla hapoh ka South West Khasi Hills District.
Lah ban kdew ba ïa ka Sngap Syiem College, Mawkyrwat la seng da ka Maharam Syiemship Higher Education (MSHEA) ha ka 11 tarik, Ïaïong, 1985 kum ka Junior College. La jer kyrteng ïa u Sngap Syiem, u Syiem jong ka Hima Maharam bad u nongïaleh laitluid pyrshah ïa ka jingsynshar phareng.
U Bah Enbin Kharraswai uba long u dkhot ka Governing Body jong ka Sngap Syiem College, Mawkyrwat haba kren kum u kongsan u la ong ba ka long kaei kaei ka jingkmen kaba khraw ban ïoh ka lad ban ïa don bynta ha kum kane ka sngi jong ka jinglehkmen jong ka kolej ha ka jingdap bad kynjoh ïa u mawmer ba 40 snem ha kaba kane ka kolej ka la nangkiew haba ïa nujor bad ki snem kiba kham mynshwa.
Ha kajuh ka por ula ai burom ruh na ka bynta ki riew rangbah kum u (L) Rowell Lyngdoh, Symbud Myntri Rangbah barim jong ka Jylla, u Dr. K.D. Ramsiej uba la wan ban shimti kumu Principal ba nyngkong jong ka Sngap Syiem College, Mawyrwat bad kiwei de kiba la don ka jingïohi jngai ban seng ne pynlong ïa kane ka Sngap Syiem College kum kawei na ki shlem ai jingai jinghikai ïa ka jingnang jingstad na ka bynta ki khun samla jong ka dong ka thaiñ.
Ym tang kata, u la ong ruh ba haba phai ha kine ki snem ba mynta hapoh ka jingïalam jong u Dr. K.K. Nongsiej kum u Principal jong kane ka kolej, la ïohi ba da ka jingtrei shitom jong u kane ka kolej ka la nangkiew na kawei uwei u snem sha uwei pat namar ha ka jingwan jngoh ba nyngkong jong ka NAAC Team na Bangalore kane ka kolej ka dang ïoh ha ka C Grade hynrei ha ka jingwan kaba ar pat la ïoh ha ka B Grade.
U la ai mynsiem na ka bynta ki nonghikai ba kin nangtrei shitom shuh shuh ban ka jingshakri ïa ka dong ka thaiñ ban ai jingnang jingstad ïa ki samla bad ha kajuh ka por u la kyntu ïa ki samla pule ba kin ïai long ki samla pule kiba trei shitom khnang ba kin nang kiew na kawei ka kyrdan sha kawei pat ryngkat ka jingïatreilang ruh bad ki kmie ki kpa.
Ha kane ka jingrakhe, ki la don ki program kyrpang kita ki long ka jingpynkup burom na ka bynta ki samla pule kiba la ïoh ïashimbynta ha ki jingïalehkai bapher bapher kham kyrpang ha kane ka Meghalaya Game 2025 kaba dang shu dep ha kaba ki samla pule na ka Sngap Syiem College ki la wanrah ka nam ka burom.
Ym tang kata na kane ka sngi ki la ïoh ruh ban pynlong ïa ka jingdie ïa ki jingbam ne Food Fest, ki jingïalehkai ne Games, ki jingpynbyrngia ne Entertainment bad kiwei de.
Nalor u kongsan, ha kane ka sngi la donlang ruh u Dr. K.K. Nongsiej, Principal jong ka Sngap Syiem College, Mawkyrwat, ka Mrs. (Dr) B. Marweiñ bad u bah S. Kharwanniang kiba dei ki Vice Principal jong ka Sngap Syiem College, Mawkyrwat, ki para nonghikai baroh, ki samla pule shynrang bad kynthei lem ruh bad ki kmie ki kpa jong ki samla pule.