Jop ka “We Ring The Bell” ha Jaiñtia Hills, ïashim bynta ki khynnah skul, ki nonghikai

Jowai, Ïaïong 11: Shi bynta na ka prokram “We Ring The Bell” Campaign 2025″ ïa kaba la sdang ban plie paidbah da ka Liliane Fonds naduh u snem 2012, da ka jingthmu ban ai jingnang jingstad lem ïa ki khynnah kiba don haki jingduna ha ki dkhot met.
Ka Jan Vikas Samiti (JVS) lem bad ka Bethany Society ki la sdang ïa kane ka prokram ha kylleng ki jaka hapoh ka Jaiñtia Hills District. Ha une u snem ka phang jong ka jingrakhe ka long “Welcoming All Children in School”, kaba peit thuh ïa ki lai tylli ki mat kata ka ‘Accessibility, Acceptance bad Adaptation’ da ka jingthmu ban pynrung skul ïa baroh ki khynnah.
Naduh ka 15 tarik haduh 30 tarik, Lber 2025, ki la don da ki hajar tylli ki skul ha kylleng ka pyrthei, kiba la shim bynta lang ha ka jingpynsawa ïa ka bells, ka bom bad ka jingput kaba shi minit. Kane ka jingpynsawa ka long shi bynta ban phah ïa ka khubor sha ki nongïalam saiñ hima sima bad ki nongïalam bapher bapher ban pyntikna baroh ki khynnah ki dei ban ïoh lem ïa ka jingnang jingstad ha ki skul.
Hapoh ka West and East Jaiñtia Hills ïa kane ka prokram la pynlong naduh ka 27 tarik Lber haduh ka 9 tarik Iaiong, 2025 ha ki 8 tylli ki skul bad ha kawei ka Anganwadi Centre. Na ka bynta ki prorkam bapher bapher la ïalamkhmat da ka Project Coordinator ka samla Risaka Challam, da ka jingïarap lang ki saw ngut ki consultants na ka JVS kiba kynthup ïa ka Hingaitphi Tang, ka Womphermi Suchiang, ka Jostina Rabon bad u Henry Shylla da ka jingïatreilang bad ka Bethany Society.
Ha ka 27 tarik Lber 2025 la pynlong ha Clearwater Secondary School, Shangpung, ha ka 7 tarik Ïaiong, 2025 ha Nongsyntoin U.P. & L.P. School, Tuber bad ha Nangbah Anganwadi Centre. Ha ka 8 tarik Ïaiong 2025 ha Robinson L.P. & U.P. School, East Jaiñtia bad ha Wapung Circle U.P. School & St. Savio RCLPS. Ha ka 9 tarik Ïaiong, 2025 ha Yakyntulang SSA L.P. School, Tuber Shohshrieh, ha Shohshrieh U.P. School, Tuber, ha Lyngdoh Colony L.P. & U.P. School, Mynsoo bad ha Kiang Nangbah Kyndong Tuber L.P. School.
Baroh ki nongïashim bynta ha kine ki prokram ki don 1,837 ki khynnah skul, 74 ki nonghikai bad 26 ki nongshah khot sngewbha kynthup ïa ki nongïalam shnong.