Shillong Jylliew 19: Ka HYC Central Body ka la ong ba hadien ba ka la ïohpdiang ïa shibun ki jingujor na ki samla kiba la ïakhun ïa ka kam Peon kaba la long ha ka 15 mynta u bnai na ka bynta ka subject “Aptitude test”, hynrei ha katei ka por eksam kiba ïakhun ki la lyngngoh ba ki jingkylli ba wan kim shym la dei satia jong katei ka subjek, hynrei ki la ïoh pynban da ki jingkylli ka subjek “General Knowledge (GK).”
Ha kaba iadei bad kane na ka liang ka seng ka la phah ka jingujor sha u Secretary ka Meghalaya Lokayukta ka sorkar jylla Shillong ban pyntip bad ba un shimkhia lem halor kane ka jingeh ba la mad da ki samla.
Ha ka jingthoh ba la soi da u Joint Secretary ka HYC-CEC u Bah Mandor Diengdoh Swer u la iathuh ba ka seng ka la phah ia kane ka jingujor sha ka ophis Lokayukta bad ka pynpaw ba kane ka jingbuh ïa ki jingkylli ha ki subject bapher bapher na kaba la pynpaw ha ka Admit Card ka la pynlong ïa kiba ïakhun ïa katei ka kam ban ym lah ban lehbha namar ba ki la pynkhreh da ka subjek “aptitude test” hynrei ki la ngat pynban da ka subjek GK.
Ka seng halor kane ka la kynnoh ba ka pyni ïa ki jingdkoh ki bor pynïaid eksam ha kaba kane ka la ktah ïa ki samla ba ïakhun ïa ka kam Peon. Ka seng ka la ïoh jingtip ruh ba ki kyrtong ba ïakhun ïa katei ka kam la bthah ban submit ïa ka Question Booklet ha ryngkatlang bad ki OMR sheet kaba ym ju leh mynno mynno ruh.
Kumba ju long ïa ki Question Booklet na ka bynta kano kano ka eksam la shah ban rah da kiba ïakhun ïa ki eksam bad tang ki OMR Sheet dei ban submit, hynrei kumba ka long ha kane ka eksam ka la wanrah pynban ïa ka jingartatien ïa ki bor pynïaid eksam bad ka rukom thungkam.
Namar kata ka seng ka la kyrpad ïa u Secretary ka Meghalaya Lokayukta ba kan ïarap ban ai jingshai halor kane ka mat khnang ba ki kyrtong bad ki paidbah babun kin ym sah ha ka umdum, ban ym artatien bad kumjuh na ka bynta ka bha ka miat bad ka khuid ka suba bad kaba shonghok, ong ka shithi ba la soi da u Joint Secretary ka HYC-CEC u Bah Mandor Diengdoh Swer.
