Nongstoiñ, Jylliew 19: Hadien ba u lapbah bajur u la ther ha kine ki sngi, ka leit ka wan ha ka surok Nongstoiñ-Maweit ka la thut bha namar ka jingtwa khyndew bad ka jingkhyllem jong ki dieng harud jong kane ka surok.
Kane ka jingtwa khyndew ka jia ha ka step Sngi Balang ha ki bun jaka shwa ban poi ha shmong Risiang, ong ka khubor ba la ïoh lum.
Mar mar ka Dhar Construction Company kaba pyntrei ïa ka surok Nongstoiñ-Maweit, ka la pyrshang ban pynkhuid katba lah naduh ka por 1:00 baje eiei da kaba pyndonkam ia ki puhshilum. Tangba ka leit ka wan ki paidbah khamtam kiba pang ba shitom ka la ktah jur bha.
Halor ka jingpyntrei jong ka Dhar Construction ïa ka surok Nongstoiñ-Maweit, ki la don bun bha kiba la kynnoh ïa ka jingtrei suki kaba long palat. La katto katne snem ba la sdang pyntrei hynrei bun ki jaka ba wat tang ki thliew muri ruh shim por haduh ar snem ban pyndep, kynnoh ki paidbah.
Ka sur na kiba ka kyntu ïa kane ka Dhar Construction Company ban kham pynsted noh khyndiat ïa ka rukom trei, khnang ba kan ym ktah than ïa ka leit ka wan ki paidbah.
Halor ka jingtwa khyndew ki la don ruh katto katne na ka liang ki dkhot ka KSU West Khasi Hills, kiba leit donkam sha katei ka thaiñ, kiba la lap hi dalade ïa kane ka jingjia, ha kaba ka la don ka jingthut ïa ka leit ka wan ki paidbah.
