Nongpoh, Risaw 19: U wei u Rangbah naka shnong Laiphew Diengan ha Ri Bhoi bala tip kyrteng kum u Sharlestine Kurbah u la ioh ban pynlait im ïa uwei u jait mrad Slow Loris na katei ka shnong kaba don haka thaiñ Mawhati hadien ba u la thied ïa u haka dor 1 hajar tyngka.
Katkum ka jingïathuh jong utei u rangbah u ba ju ieid ïaki mrad, u la ong ba ka jingioh jong u ban pynlait im ïa utei u mrad ka dei hadien ba u la lap ba don ki briew na katei ka shnong kiba ioh ïa utei u mrad bad kiba la thmu ban pyniap lane ban bamdoh, hadien ba u ioh jingtip ïa katei ka jingthmu jong ki u la pan thied noh naki haka dor T.500 da ka jingthmu ban pynlait im ïa utei u mrad hynrei kila kyntait ban ai ha katei ka dor, bad hadien ka jingïa dait dor u tei u rangbah u la pan noh haka dor T.1 hajar bad kitei ki briew kila kular ban ai noh ïa utei u mrad.
Hadien ba u la thied ïa utei u mrad naka liang utei u rangbah u la pyntip noh sha ka tnad Wildlife Nongpoh naka bynta ban wan shimti noh ïa utei u mrad bad ban pynlait im bad sumar ïa u ba un ioh ban leit phai biang sha ka jaka shong jaka sah ban lait naka jingshah pyniap da kaba kyntu ruh ïaki paidbah ba kim dei ban pyniap pathar ïaki mrad ki mreng hynrei ban pyntip sha ka tnad Wildlife naka bynta ban ioh pynlait im ïaki.
