Ha ka 31 tarik Kyllalyngkot yn pynlong ka MMS ïa ka Speed Fest—Time Attack

Shillong, Kyllalyngkot 29: Ka Meghalaya Motorsports Society ha ka jingïatreilang bad ka Motorsports Access ryngkat ka jingkyrshan na ka The Meghalaya Age Ltd, ka la pynbna ba kan sa pynlong ïa ka jingïakop ñiah kali kaba la tip da ka ‘Speed Fest—Time Attack’ kaba ar sngi lynter, ba la pynkhreh ban sdang ha ka 31 tarik mynta u Kyllalyngkot ka ban kut ha ka 01 tarik Rymphang, 2025.
ïa kane ka la pynbna ha ka 29 tarik Kyllalyngkot da ka Phoebe Dale Nongrum, kawei na ki nongñiah kali rally kynthei ba nyngkong eh ha Meghalaya kaba bat kum ka Vice Champion ha ka INRC – Women’s Category 2024 bad Chairperson jong ka MMS ha ka jingïadonlang u Ativ Shah Founder & Managing Director jong ka Motorsport Access,
Sanam Sekhon – Rally driver & Professional Drifter u ba la ju tip da u ‘Drift King of India’, lem bad ka President jong ka Meghalaya Motorsport Society – ka Easter Kharkongor.
Haba ai jingkren sha ki lad pathai khubor, na ka liang jong ka Phoebe Dale Nongrum, kawei na ki nongñiah kali rally kynthei ba nyngkong eh ha Meghalaya kaba bat kum ka Vice Champion ha ka INRC – Women’s Category 2024, ka la pynpaw ba kane kan long ka sien kaba nyngkong ïa ka Jylla ban ïoh pynlong ïa ka jingïakop ñiah kali (Motorsports) ha ka kyrdan National.
“Kane ka jaka kaba don ka rynsan ha kaba ngi pyrshang ban pynbiang jaka ïa baroh kine ki nongñiah kali, ki nongniah kali kiba dang thymmai bad kiba dang samla na Meghalaya khnang ba kin ïoh ïa ka lad ban ïakop bad kiwei pat ha ka kyrdan National na kiwei pat ki jylla,” la ong ka Phoebe Dale Nongrum.
Ka la batai ruh ba ïa kane ka jingïakop ñiah kali yn pynlong ha ki lynti ktieh, ha thaiñ Umroi, Umden Umsaitprah.
Kane ka rynsan ka long ruh shi bynta jong ka Grassroots Project ha ka Motorsports, ka jingthmu ba nyngkong eh ba la thmu da ka Federation of Motor Sports Clubs of India (FMSCI) hapoh ka jingpynïaid jong ka Fédération Internationale de l’Automobile (FIA).
Kane ka projek ka thmu ban kyntiew bad pynroi ïa ki sap kiba dang mih bad ban tei ïa ka nongrim kaba skhem na ka bynta ki jingïakop ñiah kali ha India.