SCL Third Division 2024-25: Jop ka Jong Ngi ïa ka SPC

Shillong, Kyllalyngkot 29: Ka Jong Ngi CC ka la lah ban pynliem ïa ka Shillong Press Club da 91 ron ha ka Shillong Cricket League kyrdan Third Division 2024-25 ba la pynïaid da ka Shillong Cricket League ha madan Urkaliar, Shillong.
Ka jingïalehkai ka la sdang ha kaba ka Shillong Press Club ka la jied ban bol nyngkong hadien ba jop ïa ka toss. Haba shimti ban tied nyngkong ka Jong Ngi CC ka la lah ba kan kamai haduh 205 ron haduh kaba kut jong ka 20 over ba la mang bad hap tang 4 wiket.
U ïohbor Dkhar u la kamai 52 ron naki 45 tylli ki bol, katba u Pynshngain Rymbai u la tied 50 ron naki 24 bol. Haba phai sha ki rangkawangbol ka liang pyrshah, kiba seisoh ki long u Kennyneol Sangma (4 over: shah tied 35 ron: khur 1 wiket) bad u Afaque Hussian (3 over: shah tied 26 ron: khur 1 wiket).
Haba pyrshang jubab, ka Shillong Press Club ka la shah khanglad noh na bynta 114 ron naba shah pynhap baroh 10 ngut ki wiket tang ha ka 18.1 over. U Afaque Hussain u la kamai 26 ron naki 22 bol, nangta u Prem u la kamai 19 ron naki 12 tylli ki bol.
Ar ngut ki rangkawangbol jong ka Jong Ngi, ba kynthup ïa u Donkupar Jyrwa (khur 3 wiket: 4 over: shah tied tang 24 ron), bad u Pynshngain Rymbai (3 over: shah tied 29 ron: khur 3 wiket) ki la long kiba seisoh tam namar ki la ïoh ban khur mar 3 wiket.
Ha kaba kut ka Jong Ngi ka la jop suk da 91 ron bad ïa ka nam Player of the match la khur da u Pynshngain Rymbai, uba nalor ba kamai 50 ron ha ka tied u la ïoh ruh ban khur 3 wiket ha ka bol.