Shillong, Rymphang 13: Ka Meghalaya Powerlifting & Fitness Association [MP&FA] kan sa pynlong ïa ka rynsan ïakop rah nar khia kaba la tip da ka ‘3rd Meghalaya Power Lifing’ ïa kaba la buh ban pynlong haka 29 tarik u Lber, 2025 ha Umsning Ri Bhoi District. ïa kane la pyntip da katei ka synjuk sha ki lad pathai khubor ha ka sngi Palei, ha kaba la ïadonlang u Bah Franky Nongrum uba dei u General Secretary jong ka MP&FA.
Na ka liang jong u Bah Franky Nongrum u la pynpaw ba ka jingpynlong ïa kane 3rd Powerlifing ka long kum shi bynta ban kyntiew ïa ki khynnah samla ka Jylla kiba sngewtynnat ïa kane ka jingïalehkai ba kin mih shakhmat ban wan ïashim bynta bad sei madan ïala ka jong ka sap ha ka jingïakop Powerlifing.
Na ka liang ka synjuk ka khot ka wer ïa ki samla ïalehkai na kylleng ki jaka jong ka Jylla kynthuplang ïa ki shynrang bad kynthei ba kin wan ïashim bynta sha kane ka lympung. La pyntip ba ki khynnah kiba kwah ban shim bynta ha kane ka jingïakop ki hap ban register ïalade ha ka dor 500 tyngka lyngba ki online bad yn pdiang ruh ban pynrung kyrteng ha kato ka sngi ba pynlong ïa ka jingïalehkai.
Shwa ban pynkut u la ong ruh donkam ban hikai ïa ki khynnah naduh dang rit khnang ban ïoh ïa ki player ïalehkai kiba biang bad kiba tbit hynrei lada ym ïoh ban hikai kan shem jingeh bha ban shem ïa ki khynnah kiba biang bad kiba bit.
Kane ka synjuk ka la kdew ruh ba ka jingpynrung ïa ki jait jingïalehkai ha ki skul ka dang duna bha bad ka long kaba kongsan ban pynrung ïa ki jingïalehkai haki jaka pule khnang ban kiew ka lawei jong ki khynnah kiba sngewtynnat bad ieid ïa ka sport.
Ka Meghalaya Powerlifing Fitness Association ka la kyntu ruh ïa ka Sorkar lyngba ka tnad ïalehkai ba kan ïarap ïa ka synjuk ha ka ban pynlong ïa kane ka 3rd Meghalaya Powerlifing Fitness Association khnang ba kan paw nam ka jingïalehkai Powerlifing ha ka Jylla.
