Sohra, Rymphang 13: Ka Friends United bad ka Hurdles Mawsynram ki la jop ïala ki jong ki jingïalehkai ha ka lympung ‘4th District League T20 Cricket Tournament 2024’ ba la pynïaid da ka East Khasi Hills Cricket Association [EKHCA] hynne ka sngi Palei ha Sohra. Ha ka jingïalehkai kaba nyngkong ka Friends United ka la jop da 6 wiket ïa ka Mawphlang CC, nangta ka Hurdles Mawsynram ka la jop da 88 ron ïa ka Mawmluh CC.
Ka jingïalehkai ba nyngkong ka la sdang ha kaba ka Mawphlang ka la rai ban tied nyngkong hadien ba jop ïa ka toss bad ka la lah ban tied pyndep ïa ka 20 ober ba la mang bad kamai 102 ron da kaba khyllem 9 wiket. U Wandondor Jyrwa u la long uba seisoh tam ha ka tied (32 ron naki 33 bol). Ha ka liang ki rangkawang bol ka liang pyrshah u Ernestin Swer u la khur 2/12 naki 4 ober.
Haba wan beh ha ka pali tied ka Friends United ka la lah ban pyndep ïa ka kamram ban kamai 108 ron bad hap 4 wiket naki 11.2 ober. Watla u Banbhalang Nongsiej u la ïoh ban khur 3/20 naki 4 ober hynrei u khlem shym la lah ban khanglad ïa ka Friends United ban kynjoh ïa ka thong.
U Nangkiewdor Moore Don u la long uba seisoh tam ha ka tied na ka liang jong ka Friends United, da kaba kamai 42 ron naki 30 bol ha kaba ka kynhun ka la jop ïa ka jingïalehkai da 6 wiket. ïa ka nam Player of The Match la khur da u Ernestin Swer.
Ka jingïalehkai kaba bud la sakhi ïa ka Hurdles Mawsynram kaba la tied nyngkong bad kamai 197 ron haduh kaba kut jong ka 20 ober bad khyllem 9 wiket. Na ka liang jong u Jonathan Pariong u la thlieh 39 ron naki 20 bol. U Pynbhalang Lyngdoh u la khur 3/37 naki 4 ober ha ka bol.
Haba wan ban tied ka Mawmluh ka la ïohlad ban kamai duna, kata da tang 109 ron bad khyllem 8 wiket haduh kaba kut jong ka 20 ober, u Aiban Tyngshain Rajee u la ïakhun shitom da kaba kamai 40 ron naki 58 bol.
U Namewanki Pakyntein u la long u namtam da kaba khur 3/15 naki 4 ober kaba la ïarap ïa ka Hurdles Mawsynram ban jop da 88 ron, bad u la khur ruh ïa ka nam Player of The Match.
