Nongpoh, K’Lyngkot 04: Ki nongïalam ka party Voice of the People’s Party mynta ka sngi kila hiar sha ïew Umsning ban pynithuh paidbah ïa 5 ngut ki kyrtong MDC jong ka party ki ban aireng na ki 5 tylli ki Constituency jong ka Ri Bhoi District.
Ha katei ka jingpynithuh paidbah ïa ki kyrtong la wan ruh ban sakhi da u Dr Ricky AJ Syngkon MP ka Shillong Parliamentary Seat ba dei ruh u General Secretary ka party VPP, u Bah Brightstarwell Marbaniang MLA ka Mawlai, bad kiwei kiwei ki nongïalam ba hakhmat ka party.
Ïaki kyrteng jong ki kyrtong ki ban aireng naki 5 tylli ki constituency jong ka Ri-Bhoi District la pynithuh bad pynbna da u Dr Kara H Chen Chairman ka State Election Committee ban pynshai sha ki paidbah wat hadien ba kum ka party kala pynbna ïaki kyrteng jong ki kyrtong.
Ki 5 ngut ki kyrtong ka VPP ki ban aireng naki 5 tylli ki Constituency ka Ri Bhoi District ki kynthup ïa u Bah Apkyrmen Lyngdoh na Jirang Constituency, Bah Mathew Kenneth Makdoh na Nongpoh Constituency, Bah Banrikus Nongsteng na Umsning Constituency, Bah Kynjohlang Rangtong na Mawhati Constituency bad u Bah Isynei Hinge na Umroi Constituency.
U Dr Kara H Chen haba kren ha katei ka sngi u la pynpaw ba kine ki kyrtong ki dei kiba la jied kyrpang da ka Election Committee jong ka party VPP ba kin lah ban ai ka jingshakri kaba bha tam sha ki paidbah haki constituency kiba ki mihkhmat, namar kum ka party wat hadien bala pynbna paidbah ïaki kyrteng jong ki kyrtong haki lad pathai khubor hynrei ka kwah ruh ban pynithuh sha ki paidbah, namar ki dei ki kyrtong kiba la biang pura ban shimti ïaka lyngkor.
Naka liang u Bah Ricky AJ Syngkon bad u Bah Birghstarwell Marbaniang haba kren ha katei ka sngi kila pan ka jingkyrshan naki paidbah kumba kila kyrshan haka elekshon MP kaba la dep ban pynjop don burom ïaka party VPP naka bynta shibun ki jingkylla ba kum ka party ka kwah ban wanrah haka synshar ka khaddar ba khuid ba suba bad lait naka bamsap bampong.
