Tura, Jylliew 13 : Uwei u briew ula pyniap iala u jong u hynmen da kaba dung da ka tari ha ka thaiñ Monabari, South West Garo Hills, kaba don ha khappud Mankachar, Assam ha ka janmiet sngi Ba-ar.
Kane kala jia ha ka shnong Ichakuri kaba hap hapoh ka Monabari Police Outpost. La ïathuh ba u ne briew ba leh ïa kane ka kam bymman u kyrteng u Ajadul Islam ba 28 snem bad u hynmen uba shah pyniap u kyrteng u Akirul Islam ba 32 snem.
Kane ka jingjia kala jia namar ka jingïahuri hura hapdeng jong ki hapoh ka ïingsah, kaba lam sha u pud ba u para un sei da ka tari ban dung ïala u hynmen shabar ka ïing.
Une u para hadien ba ula dep dung, ula pyrshang ban ïarap ïa la u hynmen da kaba rah ïa u sha Mankachar CHC, Assam hynrei u doktor ba don ha Hospital, ula pynbna ba u Akirul ula khlad noh ha lynti.
Ki Pulit kila kem ïa u Ajadul bad ka jingtohkit mynta kala ïaid shakhmat.
