Ka Lok Ayukta ka dei ka ktien Hindi kaba mut “Ka jingïarap na ka bynta ki paidbah lyngba u shakri sorkar lane u Commissioner. ïa ka aiñ Lok Ayukta la ithuh naduh u snem 2014 lyngba ka dorbar thaw-aiñ ka jylla Meghalaya hynrei ka la sdang trei kam tang naduh u snem 2019 haba u Lat ka jylla u la pynlong doh long snam ïa kata lyngba ka jingpynbna ha ki kot sorkar (Meghalaya Gazette). Kaba phylla ka long ba u shnong knor (Chairman) ba nyngkong eh kane ka Lok Aadalat, uba dei u nongbishar uba la shongthait (retired) jong ka ïingbishar baheh duh ka Assam (Gauhati High Court) u PK Mushahary lah thung ba un shimti ïa ka kam jong u naduh u snem 2018. Dei da ka jingtynruh jong u Mushahary ba ka sorkar ka sa pyntrei kam bad ai ïa ka ophis kaba thikna bad ruh ka la thung kam de ïa kiwei ki nongtrei haph ka Lok Ayukta.
Kaei ka jingthmu bakongsan eh jong ka Lok Ayukta lane jong u khlieh duh kane ka rynsan ïarap paidbah. Ka jingthmu jong ka Luk Ayukta ka long ban sngap ïa ka jingmudui jong ki paidbah pyrshah ïa ki kam bamsap bad ka jingbymtrei hok jong ki nongtrei sorkar. Shisien pyrkhat kane ka Lok Ayukta ka la dei ban long kaba laitluid ban leh ïa ka kam kaba la bhah na ka bynta jong ka. Katkum ka aiñ ba la rai da ka Dorbar Thaw-aiñ ka Meghalaya, u khlieh duh ka Lok Ayukta u dei ban dei u nongbishar jong ka ïingbishar ba heh na kano kano ka jylla uba lah shongthait ((retired High Court Judge), lane uno uno/kano kano ki riew pawkhmat kiba ym don jingthoh bria eiei ha ka jinglong jingman lane ka rukom trei kam jong ki (person of repute).
Hadien ba la shongthait u nongbishar (Justice) Mushahary la thung ïa u Bah Bhalang Dhar (IAS) uba la shongthait na ka kam sorkar. Ka sorkar MDA imat kam lap da kiwei pat ki briew kiba lah ban kit ïa kane ka kam bah kam san. Bad kumba ngi ju tip ba barabor hi ka sorkar ka kham sngew shaniah ïa kito kiba la long teng ki shakri jong ka, namar kin ym leh ïa kano kano ka kam kaba pyrshah ïa ka sorkar. Dei hangne kein ba ki paidbah ka jylla Meghalaya ki dei hok hi ban shah ïuhroit ha baroh kiba bat sorkar naduh u snem 1972. Ka daw ka long ba ki paidbah kim salia ban dawa ia ka hok lajong. Kim ju kham kwah ban ialeh pyrshah ïa ka sorkar wat la ka shim ïa ki rai kiba pyrshah ia ka rukom synshar khadar.
Ka jingmlien jong ki briew ha kane ka jylla ka long ban shu khmih lynti beit ïa kita ki “seng bhalang” ba kin kit ïa kane lyngkor ban ïaleh pyrshah ïa ka bamsap. Kane ka long kaba bakla shibun. Ha ka ri synshar paidbah mangi uwei pa kawei ngi don ka hok ban pyrta shla pyrshah ïa ka jingbamsap namar kane ka mut beit ba ïa ka pisa kaba dei ban wan sha ki paidbah ha ka dur jong ki surok bad ki lynti syngkien kiba bha bad kiba ikob ban ïaid kali, ym kum ki surok kiba ngi ïohi mynta kiba da ka thliew suda. Nangta ngi don hok ruh ban ïoh ïa ka um bam um dih kaba thikna (ym da kaba jakhlia bad ba dap da ki khniang jingpang) bad kiwei kiwei de ki kam pynroi.
Ki surok kiba sniew ki kdew ba ka don ka jingbamsap kaba jur ha ka tnad Public Works Department (PWD) kaba dei peit ïa ka jingshna surok ha kylleng ka jylla. Haba ngi ïaid ngi ïeng ngi sngew dukha ban iohi ia kum kine ki surok kiba tang shisien slap ki lah kiew noh lang bad ka um slap. Hynrei lait na kaba shu thnum bad ïathuh khana para mangi, ngim kloi satia ban ïa ïeng radbah kum ki paidbah kiba don ka jingkit khlieh bad lait mudui saha kata ka Lok Ayukta. Lada mangi ngim leit mudui katei ka Lok Ayukta kan ym donkam eiei ruh ban trei. Bad kiba shong hangto kin sa shu ïoh tulop ei khlem da trei eiei ruh.
Kumta ka jingkhot iangi ki paidbah ka long ba ngin ieng tylli ban iakhun pyrshah ia ka jingbam sap kumba ki paid Garo ki la sdang da kaba pyndonkam da kane ka atiar ka Lok Ayukta
