Shillong, KyllaLyngkot 28: U Myntri ka tnat ki Kam Ïalehkai jong ka sorkar jylla, u Bah Shakliar Warjri ha ka sngi Palei jong ka taïaw ba ladep u la buh ïa u mawnongrim na ka bynta ban tei ïa ka Stadium ryngkat ka madan ban siang da u phlang plastic (artificial turf) ha ka madan kaba don ha Kynshi Bangla, kaba hap hapoh ka Mawthadraishan Constituency.
Katkum ka jingkheiñ, ka mang tyngka ban tei ïa ka stadium ryngkat bad ka siang phlang plastic ka lah ban kot haduh T.20 klur tam eiei bad ka por ba la buh ban pyndep ka long kumba 2 snem eiei.
Ha katei ka sngi buh mawnongrim, la ïadonlang u Chief Secretary ka jylla u Bah DP Wahlang, u Deputy Commissioner ka Eastern West Khasi Hills u Bah Gideon Kharmawphlang, u Chief Engineer ka State Sports Council u Bah BM Syiem, ka kurim u Myntri, ki kmie ki kpa, ki nongpynïaid shnong, ki riew rangbah lem bad ki paid nongshong shnong.
U Bah Shakliar Warjri uba dei u MLA jong kane ka thaiñ haba ai jingkren u la ong, ba u la don ka jingangnud kum u nongmihkhmat ban leh eiei na ka bynta ka constituency bad kane kan dei ka sngi kaba kmen ban ïoh buh mawnongrim ban tei ïa ka Stadium kaba nyngkong eh hapoh ka district.
Lada ngi kwah ban ïohi ba ki heprit bad ki samla ba kin kiew ha ki kam ïalehkai, ka dei ka kamram jong ka sorkar pat ban pynbit pynbiang ïa ki jingdonkam, ka ban plie lad bad kum ka sorkar ka la trei shitom ban pynïoh ki shlem ai jinghikai lane kita ki academy, ki grassroot prokram, bad ban tei ki stadium, ka lynti ba ngi shim ban kyntiew ïa ka ïalehkai ha kane ka jylla, khnang ba kan long ka lynti na ka bynta ki samla ba kin long ki khlur ban lah pynpaw nam ym tang ïa ka shnong ne district hynrei ïa ka jylla bad ka ri ha ki por ban wan,” la ong u Bah Shakliar.
“Nga kwah ba ki samla ka thaiñ Kynshi Pyllun ba kin nym kut tang ha kane ka madan hynrei ba ha kawei ka sngi kin kiew ban poi sha ka State Level, National bad International Level, bad halor kine ki jingangnud ngi kum ka sorkar ngin nym shongthait hynrei ban trei shitom ban lah ban pynurlong ïa ki jingthmu.”
Shuh shuh u la ong, “Kine ki jingai ym dei ka ban pynkmen ïa ngi ne ïa u MLA ne ïa ka sorkar hynrei ka ban pynkmen ïa ki samla bad ki nongshong shnong. Ka sorkar ka la ai ïa ki stadium, kan shong pat mynta ha ki paidbah ban sumar ïa ka bad kumno ban pyndonkam ïa ka madan, ban peit ba nym don kino kino ki ban pynjulor.”
U Bah Shakliar u la pyntip ruh ba ha thaiñ Kynrud ruh yn sa ai kawei ka madan artificial turf bad kumjuh ruh ha Mawroh Markasa ruh yn ai kawei, ha kaba ki madan la dep ban buh ha ka thup kyrteng. U la pyntip ruh ba ha Bynther ha la ïoh ai ka Indoor Stadium, ha Nongkasen ruh la ïoh ban ai kawei ka Indoor Stadium.
