Shillong, Naitung 05 : U Myntri barim ka Jylla ba dei ruh u MLA ka Amlarem, West Jaiñtia Hills, Bah Lahkmen Rymbui u la ong ba ka jingjia ha Lapangap ka dei kaba hap ban pynrem, namar ka thaiñ Lapangap baroh shikatta ka dei ka thaiñ kaba shong suk wat la ka dei ha khappud bad ka Assam.
Haba kren bad ki lad pathai khubor dang shen, u Bah Rymbui uba dei ruh u dkhot ka Regional Committee pynbeit pud jong ka thaiñ Jaiñtia, u la ong ba ka Jylla ka hap ban pynthikna ka jingshngaiñ jong ki nongshong shnong bad kaei kaba jia ha Lapangap ka la wanrah ka jingbym shngaiñ ïa ki nongshong shnong.
Haba pynpaw ka jingsngewkmen ïa ka jimgshim khia ka Sorkar Meghalaya, une u MLA ka UDP u la ong ba ka Sorkar ka dei ban shim khia shuh shuh khnang ba kum kine ki jingjia kin ym jia shuh.
Lah ban kdew ba ha ka 25 tarik u Jylliew ka jingïakynad kaba jur ka la mih ha ka thaiñ Lapangap haduh ba la don ka jingkawang tyndong lyer pynsat khmat, hadien ba ki Karbi ki la leit thung dieng ha ki jaka ba hap hapoh u pud u sam ka shnong Lapangap.
Hadien kane, ki nongshong shnong da ka jingsynran lang ki sengbhalang bapher bapher ki la leit phut noh ïa ki tynrai dieng.
Na ka liang ka sorkar jylla, katkum ka jingïathuh da u Symbud Myntri Rangbah ba dei peit ïa ka tnad Kampohiing ka Jylla, Bah Prestone Tynsong u la ong ba ka sorkar jylla ka la buh mynta kumba 30 ngut ki bor pahara ha katei ka jaka bad la buh ruh ïa ka ktem pahara kaba shipor na ka bynta ban pyntikna ia ka jingshong suk shong shngain ki paidbah.
Shuh shuh u la ïathuh ruh ba na ka liang u Myntri Rangbah ka Jylla u la dep ruh ban ïa kren bad u Myntri Rangbah ka Assam halor kane ka mat.
