Nongpoh Naitung 05: Ka seng Kur Syngkli ba hap ha ka Shnong Umdihar ha Ri Bhoi District ka la shim syndon da kawei ka rai ban kyntait kur shipor ïa u Mebanker Syngkli kum u dkhot ka kur ha ka shnong Umdihar, kaba long kum ka jingpynsaja ne pynshitom halor ki kam runar jong u, kiba la pynjah burom ïa ka Kur Syngkli baroh kawei.
Ïa ka rai ban kyntait kur shipor ïa utei u Mebanker Syngli halor ki kam runar jong u, la rai hi da ka seng kur Syngkli Umdihar, kiba la ïa shong pyrkhat hynnin ka miet ha Umdihar bad da kawei ka rai ki la shim kata ka long ban tait kur ïa u shipor halor kitei ki kam kiba u la pynjah burom bad pynthobria ïa ka kur Syngkli hi baroh kawei.
Kum ban pynkynmaw, dang ha kine ki khyndiat sngi, u Mebanker Syngkli u la shah kem ha ki bor shnong ka Shnong Pahamsyiem halor ki kam runar kiba u la leh ban dawa pisa beain na ki dukan ha ka kyrteng jong kawei ka seng ba la tip kum ka Ri Bhoi People Movement. Ka shnong Pahamsyiem ka la kem ïa u bad la tohkit bad hadien kata ka la aiti sha ka Dorbar Shnong Umdihar ban leh ïa kaba donkam bad na ka liang ka Dorbar Shnong Umdihar ruh ka la leit ban aiti noh sha ki bor pulit ka Nongpoh ban leh katkum ki kyndon jong ka aiñ.
Haba kren sha ki Nongthoh khubor, u Bah F.A Syngkli, President ka Seng Kur Syngkli Umdihar bad la sakhi lang da ka jingdon lang u Secretary u Bah Bankitbor Syngkli, u la pynpaw ba ka seng kur Syngkli Umdihar ka dap da ka jingsngewsih kaba khraw halor kitei ki kam runar u Mebanker Syngkli bad kane ka jingleh jong u ka la pynjah burom ïa ka ing ka sem bad ïa ka kur hi baroh kawei.
U la ong ruh ba kane ka jingtait kur ne ka jingweng noh shipur ïa u Mebanker Syngkli na ka kur Syngkli, ka long kum ka jingpynshitom ne pynsaja halor kitei ki kam runar jong u bad ka Kur hi baroh kawei kan dang ïai peit pyrman bad lada u don kata ka jingkylla ban im bha im miat biang kum ka kur kan sa rai biang ban weng ïa kane ka jingtait kur pyrshah ïa u Mebanker Syngkli.
