Shillong, Naitung 05: Ka Khasi Students’ Union NEIAH Unit ha ryngkat ka jingïatreilang bad Ka Kyrmen Foundation, ka NEIAH (North Eastern Institute of Ayurveda and Homoeopathy), bad ka NEHU Students’ Union, ki la lah ban pynlong ïa ka jingai snam monsngewbha ne ka Voluntary blood donation camp ha NEIAH ha ka 2 tarik mynta u bnai.
Ka thong jong kane ka camp ka long ban ïarap ïa ki paidbah ha ka por ba ki donkam ïa ka snam hapdeng ka jingwan sumar jong ki. Ha kane ka camp lah ïoh ban sakhi ïa ka jingshim bynta jong 75 ngut na ki samla pule jong ka skul bah NEIAH kiba la wan shakhmat ban pyni shai ïa ka mynsiem sngewlem bad ka jingkitkhlieh na bynta kiwei.
Kum ka dak ka jingsngewnguh, la ai sngewbha sha ki ,da ki certificate, ki jingbam jingdih bad ki mementos ban pynpaw ïa ka jnglong la kloi jong ki ban wan shakhmat.
Ka President jong ka Kyrmen Foundation, ka Kong Cornellia Dkhar bad ka Secretary, ka Kong Simi Kongthiang, ki la pynpaw ka jingsngewnguh sha ka skul bah NEIAH, KSU NEIAH UNIT bad ka NEHUSU, ba kane ka program ka long kaba ïaid beit ïaid ryntih.
Ka Kyrmen Foundation, ka Khasi Students’ Union NEIAH Unit, ka NEHU Students’ Union bad u Director jong ka NEIAH ki pynpaw ka jingsngewnguh halor ka jinglong la kloi jong ki nongshim bynta ban wan shakhmat bad khmih lynti ruh ban ïatreilang nangne shakhmat ha kino kino ki kam, ong ka kyrwoh ba la phah da u President ka KSU-NEIAH Unit u K Nongkynrih.
