Jowai, Nailar 04: Ka Jaiñtia Student Union (JSU) Ummulong Unit hapoh ka jingïalam u President u samla Whymhasa Passah ha ryngkat ka jingdonlang u nongïalam ka seng kmie u samla Nevercare Passah lem bad ki dkhot ka Ummulong Unit, ki lah leit ban kynduh khnang ïa u Executive Engineer ka tnad PWD Central Division Jowai ban dawa buh noh da ki jingker ha ki lynti ïaidkjat kiba don ha shi lynter jong ka surok.
La pynsngew da ki nongïalam ka seng ba kane kan ïarap shi katdei eh ïaki khynnah skul kumjuh ïa ki paidbah nongleit nongwan kiba ïaid lynti najan u surok bad ha ka juh ka por kan long ruh ka lad jingïada na ki jingma jingmynsaw na ka jingshah lymbub kali.
Ka seng hadien ka jingïakren bad u Executive Engineer na ka liang jong u u la kular ban shim khia ban pynurlong ïaka jingdawa ka seng na bynta ka jingmyntoi u paitbah hi baroh khamtam ki nongshong shnong bad ki khynnah skul.
