Don ki seng saiñ pyrthei ki ïakhun elekshon MDC, ki kren pat ïa ka Article 371: Bah Paul

0

Shillong, K’ Lyngkot 31: U nongïalam ka UDP bad u Myntri ka sorkar jylla u Bah Paul Lyngdoh ha ka sngi Thohdieng u la ong ba ki don katto katne ki seng saiñ pyrthei kiba la long kulmar jingmut haduh katta katta ha kaba ki la ïakhun ïa ka elekshon sha ka autonomous district council (ADC) hynrei ki la kren pat shaphang ka Article 371, kaba dei baroh ka phang kaba ïapher bad ka bym don bynta eiei ban leh bad ka Sixth Schedule jong ka riti synshar ka ri India.
“Lada phi pule ïa ka Article 371 bad ka Sixth Schedule, phin pynkut da kaba lap ba ki dei baroh artylli aiñ kiba ïapher kawei ïa kawei pat ki mat treikam jong ka riti synshar ka ri bad namar kata, da kaba kwah ban pyntreikam ïa ka Article 371 ha ki thaiñ jong ki riewlum ne Sixth Schedule area kan lam sha ka jingkulmar kaba bun,” ong u Bah Lyngdoh haba kren sha ki lad pathai khubor.
“Ngam lah ban tip kum kaei ka jingpynshai ha ka jingmut jingpyrkhat kum kane ka rukom pyrkhat ki wan hynrei ka jingshisha ba mynta lait noh na ka bynta ki 3 tylli ki ward, baroh kawei ka jylla Meghalaya ka la lait napoh ka jingpyntreikam ka Citizen Amendment Act (CAA) namar ba ngi don ïa ka Sixth Schedule kum ka atiar ka riti synshar ban ïada ïa ki trai ri trai muluk jong ka jylla Meghalaya,” u la kynthoh.
Kane ka jingkren jong u, ka la wan kum ka jubab kaba don hapoh ki mat treikam ne manifesto ka Voice of the People’s Party (VPP) kaba kwah ban wanrah ïa ka Article 371 hapoh ka jylla Meghalaya.

Leave A Reply

Your email address will not be published.