Don ki nongïalam ki wan sha Ïewduh imat tang ban khroh vote, ong u Bah Sniawbhalang ha Iewduh
Kynmaw lang ruh ban duwai ym eh tang ka beiñ ka khoh - Bah Prestone
Shillong, Nailar 13 : U Symbud Myntri Rangbah ka Jylla ba peit ïa ka tnad Urban Affairs, Bah Sniawbhalang Dhar u la ong ba ki don ki nongïalam kiba leit sha Ïewduh imat tang ha ka por ba khroh vote ym da kawei pat ka jingmut.
Ïa kane u la kren ha ka jingïalang buh mawnongrim ha Ïewduh na ka bynta ban pyntrei ïa ka Phase -2 ban pynkylla dur ïa ka Ïewduh baroh kawei.
“Ha ka por ba jurip u Myntri Rangbah ha Ïewduh ha u Jymmang mynta u snem ki la don ba kynthoh ba u leit bam jadoh ha Ïew hynrei mynta phi la ïohi ba ka jingwan jurip jong u ka la urlong da ki kam,” u la ong.
Shuh shuh u ong ruh ba ha kane ka Phase-2 la mang biang haduh 13.94 klur nalor ka 5 klur kaba la mang bad pyntrei ha ka Phase -1. Nangta u ong ruh ba mynta la pynkhreh ruh sa kumba 20 -25 klur tam ha ka Phase-3 na ka bynta ban pynkylla dur pura ïa ka Ïewduh.
“Nga kwah ba ki paidbah ha kawei ka sngi kin sa khot ïa ka Ïewduh da ka Ïewduh Square,” ong u Bah Sniawbhalang.
Na ka liang u Bah Prestone pat u la ong ba hadien ba ynda la dep lut ka jingpynkylla dur ïa ka Ïewduh kaban pyntrei ha ki lai Phase, ym don shuh shuh kiban leit thied jingthied sha Khyndailad (Police Bazar) hynrei baroh kin tuid lut sha Ïewduh.
“Ynda la dep ka phase-3 ka Ïewduh kan kham itynnad bun shah ban ïa ka Khyndailad ruh,” u la ong da kaba bynrap ba kane ka kam ba ki leh ym dei satia na ka bynta ka jingmyntoi jong u Bah Prestone, Bah Sniawbhalang lane Conrad Sangm ahynrei kadei na ka bynta ka jingmyntoi ki paidbah.
Shwa kane, u ong ba ha ka por ba phah rejistar kyrteng ha Hima Mylliem ban ïoh ïa ka jingkyrshan pisa ba 10,000 tyngka bun kiba tieng namar la don kiba pynshoi ban beh noh ïa ki na Ïewduh.
“Kane ka Ïewduh kadei kaba peit da ka Hima Mylliem bad wat ka Deputy Commissioner ruh kam leh ban tuklar. Dei na kane ka daw ba na ka liang u Myntri Rangbah ryngkat lang ngi la rai ba ngi dei ban leh ei ei na ka bynta ki nongdie madan.
Nangta, u la ong ruh ba u kwah ban kyrpad ïa ka ki agency bad ki kompeni bapher bapher bad kumjuh ïa ka KHADC ba kan ïarap lang ïa ka Ïewduh namar ïa ka Hima Mylliem dei ka Council kaba dei peit.
Kumta, u ong ba u kwah ba kyntu ïa ki paidbah ba kim dei eh ban lapmiet tang ban ïa beiñ ïa khoh ïa ka sorkar hynrei ruh ban kynmaw lang ban duwai tang khyndiat ruh na ka bynta ki kam kiba bha ba ka sorkar ka leh.