Don ki MLA bym pat ïehnoh kam nonghikai wat hadien shisnem ba la shah jied : Dr Ampareen

Shillong, Lber 19 : Ka kyrtong jong ka NPP bad Myntri sorkar ka ban ïakhun na kane ka Shillong Parliamentary Constituency ka Dr Ampareen Lyngdoh ka la ther tyngeh ïa ki MLA kiba dang ïai bteng ban bam armaloi ne bat ar kam.
Haba kren ha ka jingïalang paidbah ha Mawsynram mynta ka sngi ka Dr Ampareen ka la ïathuh ba ma ka ka la ïehnoh ïa ka kam Nonghikai tang hadien hynniew bnai ba ka la dep ban shah jied kum ka MLA kata ha u 2009.
Ka la pynpaw ka jingsngew khia jur ba ki don ki MLA ba ki dang bteng beit ban bat ïa ka kam nonghikai wat hadien shisnem ba ki la shah jied kum u MLA ruh.
Ki paidbah ki dei ban wat uei une u MLA uba dang ïai bat ïa ka kam nonghikai bad ki dei ruh ban wat bniah ïa ki kyrtong kiba bat ar kam.
ïa kane ka la kren da kaba thew sha u MLA jongka Voice of the People Party (VPP) na Mawlai Constituency u bah Brightstarwell Marbaniang uba dang bat ïa ka kam nonghikai haduh mynta.