Don ka ma haba la than eh ka suk!
![](https://mawphor.com/wp-content/uploads/2022/02/editorial.jpg)
Don ka ma ha ba la than ka suk, kine ki dei ki kyntien jingsneng jong u Myllung Soso Tham ha ka khana ba dei shaphang u masi lur bad ka masi lyngki ba la sot na ka kot Phawer Aesop. Lehse ha ki sngi ba la thoh ïa kane ka ka kot kitei ki kyntien ki dang long kiba kham suhsat ba kham kylliañ ban pyrkhat bad ki long ka pharsi kaba siat jngai na ka jingim kaba man ka sngi jong ki briew. Hynrei ha kine ki sngi kitei ki kyntien ki la long ki bynta jong ka jingim kaba man la ka sngi jong ki briew. Ki briew ha kine ki sngi kiba mynta ki im shisha ha ka jingsuk na ka daw jong ka jingroi jong ka jingnang jingstad, ka ïoh ka kot bad ka jingkiew ka imlang sahlang. Hynrei ka long pat kaba shisha kaba u nongrwai u rwai ‘katba nangwad jingsuk nang kham jynjar pynban”. Kine ki dei ki sngi kiba ki paidbah ki im ha ka jingsuk hynrei shibun bah ki jingma bad ki jingbymthikna ka jingim ki ap ïa ki. Kumta katei ka ktien don ka ma ba la than eh ka suk ka kham don jingmut shibun eh ha kine ki sngi ba mynta ban ïa ki sngi kiba la thoh paidbah ïa ki ha kipor jong utei u myllung.
Ka jingim ha kine ki sngi ka la long shisha kaba suk ba lah ban ïohi ba tang ha ka jingjngai kaba shiteng kilo meter ruh ki paidbah ki la ap khia ban kiew da ka kali ne taxi kum ka nuksa na Police Pazar ha Motphran bad na them Bijoi sha Motphran. Ki khynnah skul ha kine ki sngi kham ñiar ba kin iaid kjat lait tang ki katto katne hynrei la pynsuk ïa ka jingim jong ki da ki kali na iing (hooid ka don kam eh ka kali namar ba ki kot skul ha kine ki sngi ki la khia than). Hynrei wat la katt ruh ka jingim hi ka la long kaba suk shisha. Ki briew ki ïoh ïa baroh ki jingdonkam bad ki jingkwah jong ki ha kine ki sngi, hynrei shibun ki jingeh ki ap ïa ki. Ki jait jingbam aïu ba ki briew kim ïoh ban bam ha kine ki sngi ba mynta, hynrei ha ka jaka ba kin nanglong kiba koit bakhiah pynban ki nang bun ki jingpang jingshitom. Ka jingim suk palat jong ki briew ha kine ki sngi kiba mynta ka buh ha shibun ki jingma ïa ka jingim jong ki.
Ka jingbym pynmlien shuh ban ïaid kjat ka kham pynstet shuh shuh ïa ka rta jong u briew, ki jingpang ki kloi ban kem ha ka met kaba la pynsuk palat bad ka met kam don shuh ïa ka bor ban ïaleh pyrshah ïa ki jingpang. Ha kine ki sngi kawei na ki jingpang kaba la pynsitom ïa u briew ka dei ka jingpang shini bad kane ka long ka kmie jong kiba bun ki jingpang na kane ka jingpang shibun kiwei pat ki jingpang ki ïoh ban shong skum ha ka met jong u briew. Ka jingkiew ka jingsngaid jong u briew ka dei kawei na ka daw jong ka jingim suk palat namar ba kiba bun ki bam katba ki kwah katban iaid kjat pat kim lah. Ym tang ha kaba ïadei bad ka koit ka khiah hynrei wat ha ka imlang sahlang ruh ka wanrah shibun ka jingeh bad ka jingma namar ba la than eh ka suk.
Haba peit ia ka jingkiew ka ïoh ka kot ha kine ki sngi kiba mynta la ima shisha ba dei kane hi kaba la buh ha ka jingeh ïa kiba duk ba suk pat namar ba wat la ka bam ka dih ka kiew dor kiba riewspah kim salia, hynrei kiba duk pat ki shah khñoit katba nangmih ki sngi. Ka jingsuk ba ka spah ka ai bunsien ka pynsarong ïa ki briew bad katba ki nang riewspah katta ka jingsngew ïeit iwei ïa iwei pat ka la nangduna bad ka jingiabeh sha ki kam jingïatylli ka la nang duna shibun lait noh tang ha ki por ba ïa beh burom. Ha kine ki sngi haba jia ka jingïap briew ne kino kino ki kam paidbah ym lah shuh ban ïoh ia ka jingiatreilang kum ha ki por ba mynshuwa namar ba ka jingroi ka ïoh ka kot ka pynsarong ïa ki paidbah hi. Haba don kano kano ka jingjia ïap briew lah ban ïohi ba ki paidbah ki poi tang ban ïaleit ontep burom hynrei hadien kata tang shi ïing shi sem hi.
Ka jingïoh jingsuk jong kiba bun ka wanrah ka jingpynshoi kaba jur ïa kiwei pat kiba dang duna ban kot lang sha ka juh ka kyrdan bad ki la mih shibun ki kam kiba ktah pat ïa ka imlang sahlang, naduh ki kam bamsap kam lehjubor bad kiwei pat. Katba ki briew ki nangriew spah katta ki kynroh ki nangjrong bad kane ka pyni ka ka dei shisha ba katta katba nangwad jingsuk katta ka nang jynjar pynban namar ba la nangtei kynroh bad pynjngai ïa lade na la ki parabriew