Shillong, Nailar, 18: Ka Khasi Hills Autonomous District Council (KHADC) ka la rai ban khot ïa ki samla pule kiba don ka mon ban wad jingtip shuh shuh shaphang ka riti ka dustur bad ka lariti jong ka jaidbynriew Khasi khnang ban buh jingthoh na ka bynta ka jingmyntoi jong ki longdien ka pateng ka ban sa wan.
Ha ka jingïakren bad ki lad pathai khubor ha ka sngi Palei, u Chief Executive Member jong ka Khasi Hills Autonomous District Council u bah Pynïaid Sing Syiem u la ïathuh ba ki don 17 tylli ki bynta ban wad jingtip shuh shuh bad ban tih bniah halor kane ka bynta.
U la ïathuh ruh ba ïa kane ka kam la bynshet ha u Executive Member uba peit ïa ka tnat Pule Puthi jong ka council da ka jingïarap ban bei pisa da ka ka sorkar Jylla.
“Ngi la ïakynduh ruh la ar sien kynthih ïa u Myntri Rangbah Conrad Kongkal Sangma halor kane ka jingthmu bad ka la long ka jingïakren kaba seisoh ha kaba u Myntri Rangbah ruh u la kular ban bei pisa ïa ka KHADC na ka bynta ban leh ïa kane ka jingwad bniah halor ka riti ka dustur bad ïa ka lariti jong ka jaidbynriew Khasi,” ong u Bah Syiem.
“Ngi ladep nadong shadong. Ngi ladep phah ruh ïa ka jingtyrwa sha ka Sorkar Jylla na ka bynta ban mang pisa halor kane ka jingthmu,” u la bynrap.
