Nongpoh, Nailar 18: Kumba ka jingpang khmat ka la sdang ban sar kylleng ka dong Ri Bhoi bad ka dei ruh ka jingpang ba lah ban ïa bit sha kiwei, ka tnad ka koit ka khiah na Ri Bhoi ka la kyrpad sha baroh ki paidbah ba ki dei ban shim ïa ki lad jingïada ban lait na ka jingsaphriang kane ka jingpang khmat.
Kane ka jingkyrpad ka tnad ka koit ka khiah sha ki paidbah ka Ri Bhoi ban shim ïa ki lad jingïada na kane ka jingpang khmat ka dei ruh hadien ba kane ka jingpang ka la saphriang bad bun kiba la shah ktah na kane ka jingpang khmat naduh ki khynnah skul bad ki riew paidbah.
Haba ïakren bad ki lad pathai khubor mynta ka sngi, ka District Medical and Health Officer ka Ri Bhoi, ka Dr.T.S Momin bad ka Eye specialist, ka Dr. N. Kharnaior ki la pyntip ba la don bun ki ba shah ktah na kane ka jingpang khmat (Epidemic Conjunctivitis) naduh ki riew paidbah bad wat ki khynnah skul bad ki la kyntu ba dei ban shim ïa ki lad jingïada da kaba leit sha ki jaka ai jingsumar ka sorkar ban ïoh ïa ka jingsumar bad ki dawai.
Kitei ki riew shemphang jong ka tnad ka koit ka khiah ki la kyrpad ruh ïa ki paidbah ba kim dei ban shu thied ïa ki dawai tang na ki pharmacy, hynrei ki dei ban leit sha ki doctor ban peit bñiah khnang ba kin ai ïa ki dawai kiba ïa dei bad kane ka jaid jingpang kaba kum ki paidbah kim dei ban dih bad tah dawai klumar khlem ka jingpeit jingkhmih ki Doctor.
Ka Dr. N. Kharnaior kum ka Eye Specialist ka la batai ruh ba kane ka jingpang khmat ka dei ka jingpag kaba lah ban ïa bit sha kiwei bad ki dak ki shin kiba paw ka dei ka jingsaw ki khmat bad ka jingmih ki eitmat bad kito kiba shah ktah ruh kim lah ban peit ïa ka jingshai.
Ka la batai ruh ba kito kiba shitom ki khmat kim dei ban leit sha ki jaka paidbah ki dei ban shong ha ïing bad ban pynjngai na kiwei lane ki dei ban phong da ki kynja ïitkhmat ba ïong khnang kane ka jingpang khmat kan nym pur ne bit sha kiwei. Shuh shuh, ka la btai bñiah ruh ba ki paidbah ki dei ban shim ïa ki lad jingïada da kaba leit sha ki doctor ne ki jaka ai jingsumar namar kane ka jingpang khmat ka dei kaba ktah na ka jingkylla ka bor mariang ne ki don ki kynja khniang jinpang (Virus) kiba saphriang kloi bad kiba bit sha kiwei, ka la bynrap.
