Dei kito bym ju kiew ïingmane kiba thmu pynthohbria ba ngan phah khang ïingmane: Bah Hamlet

Shillong, Rymphang 19 : U kyrtong ka NPP na Mylliem, Bah Hamlet Dohling ba dei ruh u MLA ba dang shu resaiñ shen u la ong ba dei kito ki bym ju poi ïingmane kiba pyrshang ban ïalam bakla bad pynthohbria ïa u ba un sa phah khang ïa ki ïingmane lada jop biang kum u MLA.
“Ki ong ba da jop Bah Ham yn ym ïoh leit ïingmane shuh nsf yn khang tala noh ïa ki ïingmane. Long seh ban kren kumta por elekshon. Ha kawei ka jingïalang nga phah peit noh mano ba ong kumta. Hynrei uta uba ong kumta ïalade pat sha ïingmane um ju kiew. U nangmut ba manga ruh nga long kum uta bym ju poi sha ïingmane. Kim tip ba lada nga long kum u MLA ne Myntri sorkar ruh man ka sngi u Blei nga poi beit sha ïingmane,” ong u Bah Hamlet ha ka jingïalang ïalap elekshon kaba long ha Bañiun ha ka janmiet sngi Saitjaiñ.
Ha katei ka janmiet ki la don bun bha ki nongshong shnong kiba wan ban sngap ïa ka jingpynshai na u nongmihkhmat jong ki khamtam haba ïadei bad ki kam pynroi ba u la leh ha kine ki san snem kum u nongmihkhmat.
Na ka liang u Bah Hamlet u la pynpaw ruh ïa ka jinglyngoh ba bun ki kyrtong kim kren shuh ïa ki mat ïakhun elekshon jong ki hynrei la shu kynthoh beit shimet tang ïa u.
“Ba kin kren ba ym don kam pynroi ruh kim nud kumta ki la shu kynthoh beit tang ïanga bad sdang ruh ban pynthame da kumne kumtai,” u la bynrap biang.
Nalorkata u Bah Hamlet u ong ruh ba ki paidbah ki dei ban husiar na ki briew kiba wan rung miet da kaba ong ba kitei kiba leh kumtei ki ju leh tang shibnai shwa ka elekshon bad hadien ka 03tarik ym ïohi shuh ïa ki
“Dang kham suk ba wad ïa ka khnai ban ïa kitei ki briew hadien ka 03tarik u Lber,” la bynrap biang u Bah Hamlet.
U Bah Ham u la ong ruh ba ka thong jong u ka long ruh ban ïohi ba kan don noh kawei ka college ha Mylliem kaban pynsuk ïa ki samla ka thain kiba hap ban lut ka bai kali man ka sngi nalor ba rem ka bai rung klas bad jynjar ruh ban ïoh rung ha kitei ju jaka pule man u snem. Shuh shuh u ong ruh ba ka IT Hub kadri kawei pat ka thong kaba u thrang ban wanrah ka jingkylla na ka bynta ka thaiñ ha ki san snem ban wan.
“Don kiba pyrshang ïalam bakla, ba ym don ka roi ka pa, kumta ki la buh jingkylli leh aiu nga la leh ha kine ki san snem. Tangba haba kyllu dei ban kylli lang ïa kiwei ruh ba long MLA arsien, MDC arsien ba aiu kine ruh ki la leh. Phi don ka hok ban kylli bad kane ruh kadei ka por ba phi ïoh ban kylli,” u la ong da kaba bynrap ba ym myntoi shuh ban khnium da la dep ban ñiew vote.
Shuh shuh u la kyntu ruh ïa ki nongshong shnong ban peit bad bishar ïa ka kaiphod treikam kaba u la pynkhreh kaba pyni lut ïa ka rukom treikam jong u ha kine ki san snem wat hapdeng ka jingpynthut ka khlam COVID.
“Hato la ju don ki MLA ba wan ai ïa ka kaiphod treikam sha ki paidbah, nga ruh nga dei trai shnong ngam pat lap ban don MLA ban ai ïa ka kaiphod kumne.Ynda phi la pule ïa kane ka report phin sa tip ba ka vote jongphi kam shym la lehnohei.”
Shwa kane u President ka NPP Meghalaya Dr. WR Kharlukhi u la ong ba ki paidbah lada ki jied biang ïa u Bah Hamlet ki tikna ba kin sa ïohi biang ïa u ha ka shuki Myntri katba lada jied ïa kiwei pat kin don ha ka Liang Pyrshah.