Shillong, Rymphang:Na ka liang u Deputy Commissioner ka East Khasi Hills u Sibhi Chakravarty Sadhu uba long ruh u District Election Officer (DEO) ula pynmih ïa ka hukum ha kaba la mana tyngeh ban die kyiad hapoh ka District ha ka 25, 26 bad 27 tarik mynta u bnai bad ha ka 2 tarik u Lber kaba dei ka sngi niew vote.
U DC ula pyntip, ba katkum ka bor kaba la pynkup ha u lyngba ka Section 135 C jong ka Representation of Peoples Act 1951, u pynbna paidbah ba la mana ban die kyiad ha ka 25, 26 bad 27 tarik u Rymphang ha kylleng ki jaka kiba hap ha u pud u sam jong ka East Khasi Hills District.
Ula maham tyngeh ba ha kitei ki sngi ym dei satia ban die, ai ne sam ïa kino kino ki jingdih pynbuaid ha ki Hotel, ki dukan bad kiwei kiwei ne ha kino kino ki jaka paidbah ne jaka jongki riew shimet ne hapoh jong ki jaka thep vote.
Nalor kata u DC ula pynbna ruh, ba ha ka 2 tarik u Lber ruh kaba dei ka sngi ñiew vote, yn ym shah ban die kyiad hapoh ka District.
