Dei ba shlur 3 ngut ki khynnah skul la rai ban ai Dulan Thymmai ha Pine Mount skul: Conrad

Shillong, Naitung 02: U Myntri Rangbah ka jylla u Conrad K Sangma ha ka sngi Palei u la ai ka jingïaroh ïa ki 3 ngut ki khynnah skul ka Pine Mount School Shillong ba ki la nud, ki la shlur bad pyni ïa ki jingjulor ka Hostel jong ki ha ka por ba u la wan ban jurip ha ka 17 tarik u Risaw 2022 ïa ka skul, da kaba ong ba lada ymdei na ka jingshlur kine ki khynnah skul yn ym lah ban ïoh ïa ka boarding kaba thymmai.
Ïa kane u la kren ha ka prokram plie ïa ka Boarding ba thymmai bad ka jingpynlait ruh ïa ka She Thrives jong kane ka Boarding, ha ka jingïadonlang u Myntri ka Tnat pule puthi u Bah Lahkmen Rymbui, nangta u Myntri ka Tnat Arts and Culture u Bah Sanbor Shullai, u Chief Secretary u Dr. Shakeel Ahmed, ki ophisar, ka Principal, ki nonghikai bad ki spah ngut ki khynnah skul nalor kiba shah khot sngewbha.
U Myntri Rangbah, haba ong ba dei tang ka prokram kaba rit, hynrei kadei ka nuksa ba kine ki khynnah skul laingut ki la pyni, namar jong ki, mynta da ki spah ngut pat ki khynnah skul ki la ïoh ban sah hapoh ka Boarding kaba bha, kaba biang ki jaka leitbar, la lait na ka jingpei ki tnum, ka jingdon ki khnai bad kiwei kiwei pat.
Ha kane ka sngi la ïoh ka jingkren na u Myntri ka Tnat pule puthi uba la pynpaw ba ki khynnah skul mynta ki la shah ban khia nalor ka pule ki hap leh sa ia ki entrance exam.
U Myntri Rangbah u khot ruh ïa ki khynnah ban phah kylli jingkylli halor ki jingdonkam jong ki bad kiwei kiwei ki prokram.
“Ki jingkylla ki shimpor, hynrei kaei kaba kongsan ka long ba ngi leh ïa ki kam haba ngi ïohi ïa ki jingdonkam. Kawei ka sienjam kaba rit ruh ka long kaba kongsan. Lada ngi sngap, jubab, bad trei khlem sngeh, ngi lah ban wanrah ïa ka jingkylla kaba shisha,” ula ong.
Ula pynlait ruh ïa ka prokram “She Thrives”, ka sanitary pad vending machine kaba don bad ki sanitary pad, kaba thmu ban kyntiew ïa ka khuid ka suba bad ka burom ki khynnah skul kynthei ha ba ki poi jingpoi. Kane ka prokram ka long shibynta na ki jingpyrshang ban weng ïa ki jingeh kiba mad na ka sngi sha ka sngi da ki khynnah kynthei ha ki skul. U pyntip ba ïa kane ka prokram yn sa pyntreikam ha baroh kawei ka Jylla ban pynthikna ba man ki khynnah kynthei kin ïoh ïa ki jingdonkam ha ka jingleh khuid.
Ha ka jingïalang ïakren markhmat bad ki khynnah skul, u Myntri Rangbah ula ai jubab ïa ki jingkylli haba ïadei bad ki kabu ïohkam ïohjam bad ka lawei jong ki khynnah mynta. Ula batai ba katba ka jingdon ki kam Sorkar ka long kaba duna bha, ka Sorkar ka la thaw ïa ki policy bad ki prokram ban thaw ïa ki lad ki lynti lyngba ka jingsengkam sengjam bad ka jingkiew ha ka kam shimet.
“Ngi dei ban sngewthuh ïa ka jingshisha, manla u snem da ki hajar ngut ki samla ki rung ha ka jylli wadkam, hynrei tang khyndiat tylli ki kam Sorkar ki don. Kumta, ka lawei ka shong ha ka sengkam lajong, ka buit treikam thymmai bad ki kompeni shimet,” ula ong.
Ula batai shuh shuh ba ka Sorkar ka la kynshew ha ki kam kiba kongsan kum ka kam jngohkai, IT, ka rep ka riang, bad food processing ban lah aikam aijam bad kyrshan ïa ki samla kiba angnud ban sengkam lajong.