Nongstoiñ, Naitung 02: Ka jingnang jingstad ka dei kaba donkam tam ha kane ka juk ba mynta bad ka long ruh kum ki mawjam sha ka lawei ba phyrnai ym tang ha ka jingim jong uno uno ne kano kano ka briew shimet hynrei ka long ruh ka jingmytoi ïa ka shnong ka thaw, ka imlang sahlang bad ka jylla hi baroh kawei.
Haba phai ha ka jingroi sted ki jong ki shnong ki thaw ha West Khasi hills ka shnong Rambrai ka dei kawei na ki shong kiba la kiew sted bha ha baroh ki liang.
Ka jingkiew bad roi sted jong katei ka shnong ka dei ka jingdon jong ki artylli ki secondaty skul ka St. John Bosco Higher Secondary kaba don ha Nongkroh bad bad ka United National Secondary School ha Mawrang. Kitei ki ar tylli ki skul ki la ong ruh ki shlem ai jinghikai kiba tbeh jingshai ïa ka thaiñ baroh kawei kaba kynthup da ki spah tylli ki shnong kiba don haduh kibynta ba ha syndah eh bad ka jylla Assam.
Nalor kata katei ka thaiñ ka dei ruh ka thaiñ kaba sei soh bha ha ka rep ka riang bad ki nongshong shnong ki dei kiba smat ba sting bad kiba trei shitom bha ha ki kam ki duk ba ki trei.
Haba phai sha ka jinglong jngman jong katei ka thaiñ la lap ruh ba naduh ba la dep ban shna ïa ka surok naduh Nongstoiñ haduh Mawthir katei ka thaiñ ka la kiew sted bha bad ka jingdon jong ki khynnah pule ha kitei ki artylli ki skul ruh ka la kiew sted bha.
Haba pyrshang ban twad jingmut na ki nonghikai jong kitei ki artylli ki skul kiba la paw bha ha ka thaiñ ki la ong ba kitei ki skul ka la long shihs ki sharak kiba tbeh jingshai ïa ka thaiñ baroh kawei ym tang ha ka pule puthi bad ka jngnang jingstad hynrei ha ka imlang shalang ha man la ki shnong.
Nalor kata ki la ong ruh ba kat kum ka jingïaid jong ka por ka la i donkam ruh ba kan don noh sa ka College khnang ba kan pynsuk ïa ki khynnah kiba dei na ki long ïng kiba duna ka ïoh ka kot ba kin bteng ïa ka jingpule ka jong ki namar haba ki la pass ïa ka Higher Secondary School Leaving Certificate ka ïng ka sem kam lah shuh ban kyrshan hynrei lada ka Collge ka don ha Rambrai ki don ka lad ban bteng ïa ka jingpule jong ki.
