Dawa u Bernard na u Amit Shah ban tuklar halor ka jingbym pyntreikam ïa ka soskular bad ka ANVC-ANVC -B

Shillong, Jylliew 29 : U MDC ka BJP na Tura uba dei ruh u Chairman ba rim ka ANVC-B u Bernard N Marak mynta ka sngi u la phah da ka jingthoh sha u Myntri Kam Pohïing ka sorkar pdeng u Amit Shah ban tuklar hi noh da lade halor ka jingbym pyntreikam ïa ka sorkular ne ka Agreed Text for Settlement (ATS) ba la ïasoi hapdeng ka sorkar jylla, sorkar pdeng, ANVC bad ANVC-B naduh ka 24 tarik u Nailur 2014 bad kumjuh ruh ban khot pynlong noh ïak a Centre Level Monitoring Committee ha nongbah Tura kloi katba lah.
Kat kum ka soskular ba la ïasoi hapdeng ka sorkar pdeng, sorkar jylla, ka ANVC bad ANVC B kawei na ki kyndon ka long ban pynkhlaiñ ïa ki Autonomous District Council (ADC) hapoh ka jylla bad kumjuh ruh ban ai ïa ki song jingïarap sha ki dkhot jong kitei ki seng kiba la wan pyndep khnang ba ka jingshong suk shongsaiñ kan ïai bteng ha ri lum Garo.
Ha ka shithi jong u Bernard sha u Amit Shah u la pynpaw ka jingsngewkhia jur halor kane ka jingbym pyntreikam ïa kine ki jingïakut ha ka soskular da kaba u ong ba wat la da ki spah ngut ki dkhot ka ANVC bad ANVC-B kila wan pyndem hynrei haduh mynta kim pat ïoh ïa kita ki song jingïarap jongki. Kita ki tnad kiba dei ban pynpoi ïa ki pisa sha ki ADC ruh kim pat pynpoi haduh mynta bad ïa ka Monitoring Committee ruh khlem khot shuh naduh u snem 2019.
U la pynpaw ruh ïa ka jingkheiñ sting jongka sorkar jylla ban thaw ia ka State Level Monitoring Committtee bad ïa ka State Finance Commission kumba la ïarai ha ka soskular.
U la kynnoh ïa ka pisa ba la mang na ka bynta ki ADC la pyndonkam noh shawei ne la pynslem da ki heh sorkar da kaba leh bym suidñiew ïa ka soskular.
U Bernard u la kyntu ïa u Amit Shah ba un bthah ïa u Joint Secretary (NE) ka Ministry of Home Affairs ban khot ïa katei ka Centre-Level Monitoring Committee ha nongbah Tura kloi katba lah.
Namar u ong ba kane ka jingpynsuki bad jingbym pyntreikam ïa ka soskular ka long kum ka jingshet kylla ïa kaei kaba la ïasoi ha ka ATS bad ka la nang pynduh noh ka jingshaniah jong ki paid Garo ha ka sorkar pdeng.