Nongstoiñ, Jylliew 28: Na ka bynta ban pynkhlain shuh shuh ia ka jingtreikam hapoh ka ri Khasi Jaiñtia, ka Central Executive Committee jong ka Seng kur Myrthong/Marthong Khasi-Jaiñtia ha ka 21 tarik mynta u bnai, ka la pynlong ïa ka jingïalang ha ïing dorbar jong ka shnong Lumshyiap ha Shillong.
Ha katei ka jingïalang ka CEC ka la ïathir ïatai bad pyrkhat sani ïa ki ba bun ki kam kiba ïadei bad ki mat ban pynkhlaiñ ïa ka dorbar kur. Nalor kata ka CEC ka la ïatai sani ruh halor ki katto katne ki mat kiba ka dorbar Kur ka la buh thong naduh mynshuwa bad kumba ka Khasi Hills Autonomous District Council ka la dep ithuh bad pynkup bor ïa ki dorbar kur.
Nalor kata ka CEC ka la ïakut ruh ban nang pynkhlaiñ shuh shuh ïa ki dorbar kur ha baroh ki district ha ri Khasi bad Jaiñtia. Ha kajuh ka por ka CEC ka la shim jingkheiñ ïa ka jingdon jong ki dkhot jong ka Kur ha baroh kawei ka ri Khasi Jaiñtia. La ïakut ruh ban pynlong ïa ka Dorbar bah jong ka kur ha Nongkasen ha ka 6 tarik jong u bnai Nohprah jong une u snem 2025.
Ka CEC ka la pynthymmai ia ki Nongkitkam ba kynthup u President Bah Planderwell Myrthong, Vice president Rev B.A. Myrthong, Secretary Bah Venial in goodhope Myrthong Assistant secretary, bah Zandy Myrthong bad Bah S.B Myrthong, Finance secy Rev P.Myrthong, Treasurer Kong Gifty Myrthong, Statitician bah C.Myrthong bad 20 ngut ki dkhot ka Executive Committee.
