Shillong, Jylliew 29 : Ka Dorbar Mangtyngka jong ka KHADC kaba sdang ha ka 24tarik Jylliew ka la, ka la pynithuh bad pdiang burom ïa u MDC shu sieh lane u nominated MDC ba thymmai jong ka Council, u Bah Mathew K Makdoh.
Ïa u Nominated MDC ha kane ka sngi la pynithuh hapoh Ïing Dorbar da u Chairman ka KHADC Bah Strongpillar Kharjana.
“Kumta ha ka kyrteng jong ka Council, nga pdiang burom ïaphi sha ka Ïing Dorbar bad ngi ngeit ba da ka jingdon jong phi kan nang ïarap ban pynbha shuh shuh ïa ka Council,” ong u Chairman ha kane ka sngi.
Ka jingthung ïa u Bah Mathew kum u Nominated MDC kadei hadien ba u Lat ka jylla u CH Vijayashankar u la mynjur ïa ka kyrteng jong u kaba la phah lyngba ka jingai jingmut jong ka Executive Committee jong ka Khasi Hills Autonomous District Council ba ïalam da ka Voice of the People’s Party.
Lah ban pynkynmaw, u Bah Mathew Makdoh u dei u kyrtong MDC ka VPP na Nongpoh constituency u ba la shah rem noh ha ka elekshon hadien ba ki paidbah ki la jied ïa ka Kong Rona Khymdeit na ka NPP.
Kumba long haduh mynta, ka VPP kaba don ha ka Liang Synshar ha KHADC ka la don mynta haduh 18 ngut ki MDC lada kheinlang bad u Nominated MDC.
