Shillong, Jymmang 14 : Ki Dorbar Shnong Riwar hapoh ka lama Federation of Riwar Mihngi Local Dorbars(FRMLD) ki la ai jingthoh sha ka SDO Pynursla Civil Sub Division ha kaba ki la dawa ba ki BSF kim dei ban pyndik bad pynsyier ïa ki paidbah ha ki thaiñ khappud. Ha katei ka jingïakynduh ha ka Sngi Palei ki la dawa ba dei ban pynthikna ba ki BSF ki dei ban pahara ha khappud ym ban wan sha ki shnong ki thaw kiba don ha khappud.
Ki la dawa ba ka sorkar ka dei ban siew bai lutksan ïa ka longïing u lanot ha ki kuli jong ki BSF u bah Ronningstar Nongkynrih.
Nalor kane ki la dawa ruh na ka SDO ba ka dei ban bthah noh ïa ki kompani kiba pyntrei ïa ka surok Shillong shaduh Tamabil ba ki dei ban sdang noh ban siang rong ïa ka surok naduh Pynursla haduh Nongshyrngan. Ki la kyntu ruh ïa ka SDO ba kan shim khia ban teh lakam ïa ka suk ka saiñ ha ki bynta khappud.
Ki la dawa ruh ban thung da ka jingtohkit ba laitluid halor ka jingjia jong ka jingtwa ha Rngaiñ kaba la wanrah ka jingiap ïa arngut ki mynsiem briew. Nalor kane ki la pyntip ruh sha ka SDO ba kiba haïing jong kine kiba iap ha kane ka jingtwa kim pat ïoh jingïarap ei ei ruh na ka srokar haduh mynta bad ki kyntu ïa ka SDO ban bud dien ïa kane ka kam ruh.
