Dawa ka RBYF ban pyntreikam pura noh ïa ka aiñ MRSSA katba ym pat treikam ka ILP

Nongpoh, Jylliew 09 : Ka Ri Bhoi Youth Federation (RBYF) kum kawei na ka seng hapoh ka jylla mynta ka sngi ka la dawa syndon na ka sorkar Meghalaya ba ka dei ban pyntreikam noh ïa ka aiñ Meghalaya Residents Safety and Security Act, 2016 katba ym pat lah ban pyntreikam ïa ka Inner Line Permit ba la dawa na ka sorkar kmie kaba dang sahkut ha ka Ministry of Home Affaire, kaba long shi bynta ban lah ban tehlakam ïa ka jingwan rung wan mih ki briew kiba na shabar ka jylla.
Ka seng RBYF ka la pynpaw ïa kane jingdawa ban pyntreikam shwa ïa ka MRSSA, 2016, ka dei halor ka jinglong jingman kaba la pynjah burom ïa ka jylla Meghalaya, da ka jingwan poi ki shikumrim u Raja Raghuvanshi bad ka Sonam Raghuvanshi na Indore jong ka jylla Madhya Pradesh, kaba la pynjah burom shisha ïa kane ka jylla bad ka daw hi ka long namar ba kam don kano kano ka jingtehlakam ïa ka rung ka mih ki briew kiba na shabar ka jylla.
Haba ïa kren bad ki Nongthoh Khubor, u President ka RBYF Sengkmie, u Bah Bipul Thangkhiew, u la ong ba ka seng ka sngewkhia halor kane ka jinglong jingman kaba la pynjah burom ïa ka jylla bad kaba la buh jingsyier ruh ïa ka jylla, na ka jingjia kitei ki shi kurim kiba na shabar ka jylla, ki la ioh lad ban wan leh ïa ki kam sniew ban pynjah burom ïa ka jylla, tang na ka daw ka jingbym don kata ka jingtehlakam na ka sorkar halor ka rung ka mih ki briew na kiwei ki jylla sha kane ka jylla Meghalaya.
U la ong ruh ha ka jingshisha ki seng bhalang bapher bapher jong ka jylla ki la dawa ban pyntreikam noh ïa ka ILP naduh ki snem ba la leit noh bad la pynjur ruh ïa ka jingdawa ha u snem 2013 ban pyntreikam noh ïa ka ILP, hynrei namar ba ym pat ioh ïa ka ILP, ka sorkar MUA ba la ïalam da u Dr. Mukul Sangma kum u Myntri rangbah ka jylla ka la pynlong aiñ ïa kawei ka aiñ ba la tip kum ka Meghalaya Resident Safety and Security Act, 2016 (MRSSA) ban tehlakam ïa ki briew kiba rung ba mih sha kane ka jylla bad wat ha ka sorkar MDA-I ruh ba la lamkhmat da u Conrad K. Sangma ka ingthaw ain ka jylla ka la ai ka jingmynjur ban pyntreikam noh ïa ka ILP bad ba la phah ïa ka jingmynjur sha ka sorkar pdeng bad ka long pat kaba sngewsih ba haduh mynta kane ka kam ka dang sahkut ha ka Ministry of Home Affair ba kim pat ioh satia kata ka jingmynjur ban pyntreikam ïa ka ILP ha ka jylla Meghalaya.
U la ong ruh ha ka jingshisha ka Meghalaya Residents Safety and Security Act, 2016 ka dei ka aiñ kabba la pynlong aiñ bad la lah ban pyntreikam hapoh ka jylla ban tehlakam ïa ki nongshongwai ne ki briew kiba wan rung na shabar sha kane ka jylla, hynrei kaba sngewsih wat la kane ka aiñ ka la long aiñ bad ym shym la lah ban pyntreikam ïa ka haduh kine ki sngi ha kaba la kut tang hapoh ki jingdawa ki seng bhalang.
“Ka sorkar ka la mynjur ruh ban buh ïa kawei ka khydop ban tehlakam ïa kiba ka rung ka mih ki briew kiba na shabar ka jylla kynthup ïa ki nongjngohkai pyrthei ha Umlling bad ba la tip ruh kum ka Facilitation Centre, hynrei kane ka la shu sah tang ha ka kyrteng khlem da treikam bad ka la long ruh ka jingpynsepei ïa ka pisa ka sorkar ba la pynlut da ki klur ban tei ïa katei ka Facilitation Centre na ka bynta ban tehlakam ïa ka rung ka mih ki briew kiba na shabar ka jylla” ong u Bah Bipul Thangkhiew, President ka RBYF Sengkmie.
U la ong ruh la jin ba katei ka Facilitation Centre ha Umling kan treikam la lah ban tehlakam ïa ka rung ka mih ki briew kiba na shabar ka jylla kum kitei kiba la wan rung naduh ka shnong Indore, Madhya Pradesh bad na Uttar Pradesh ban leh ïa ki kam sniew kaba la pynjah burom shisha ïa ka jylla bad ka jingbym treikam katei ka khyrdop ki la shu ioh rung suk khlem kano kano ka jinglum kyrteng ban tip ba ki wan naei bad ki leit shaei ba kam don kata ka jingtehlakam na ka sorkar ne ban pyntreikam kam ïa kita ki aiñ kiba tehlakam ïa ki briew kiba wan na shabar.
Namarkata, ka RBYF ka la dawa na ka sorkar jylla ha ka jingïalam u Conrad K. Sangma kum u Myntri Rangbah ka jylla ba dei ban pyntreikam noh mardor ïa ka MRSSA ha ka jylla, katba ym pat lah ban pyntreikam ïa ka ILP bad ka seng kam kwah ba mih kum kine ki jingjia jong kitei ki shi kurim na Indore Madhya Pradesh kaba la pynjah burom ïa ka jylla bad ka daw hi ka long tang namar ba ka sorkar kam don satia ka jingkitkhlieh ban tehlakam ïa ka rung ka mih ki briew kiba na shabar ka jylla, u la bynrap.