Shillong, Risaw 16: U Bah Jewel Son Roy Lyngdoh u President jong ka Meghalaya College Non-Teaching Employee Association (MCNTEA) u la ong ba ka seng ka dawa na ka sorkar ba kan siew noh ïa ka Dearness Allowance kaba 53% bad ban pyntreikam ïa ka Modified Assured Career Progression Scheme (MACPS).
Haba kren ha ki lad pathai khubor ha Shillong Press Club u Bah Jewel u la ong ba kum ki nongtrei ha ki College ba dei ki Deficit ha kylleng ka jylla kim kwah ban ïa mih madan ki la ïai buddien ïa kane ka Dearness Allowance mynta la arsnem lynter hynrei kaei kaba ki ïoh jingtip ba ka sahteng bad ka tnad pla pisa ka sorkar jylla.
Kum ki nongtrei kila ïai shah namar ki sngewthuh ba ka kam ophis ka shim por hynrei mynta ka la dei ba kin ïoh haduh lai sien ïa ka Dearness Allowance naduh ka por ba ka dang dei 49% bud sa ka 51% bad mynta ka la dei sa ka 53% hynrei mynta ki sah ha ka umdum dei na kane ka daw ba kim banse shuh ban pyntip lem sha ka sorkar lyngba ki lad pathai khubor.
U Bah Jewel u la ong ba na ka jingïohi ka jong ki u Myntri Rangbah ka jylla ula ong uba kloi ban ïarap kumta ki kyrpad ïa u ban ïarap lem ban buddien lem na kaei ka daw ba ka sahkut ka DA ka jong ki bad ban pyntreikam noh ïa ka Modified Assured Career Progression Scheme na ka bynta ki bym dei ki nonghikai hynrei kiba trei ha ki College bapher bapher ha ka jylla.
Na ka liang ka seng ka dawa na ka sorkar ba ka dei ban leh eiei ban pyllait noh ïa ka DA ha shuwa ka 1/Naiwieng/2026 lada ka sorkar kam leh eiei ki ruh kin hap ban pyrkhat da kum wei pat namar ka jingkiew dor ki marbam mardih ha ïew ha hat ka la ktah ïa ka ïing ka sem jong ki kaba manla ka sngi, nalor kiwei kiwei pat ki jingdonkam.
