Shillong, Ïaïong 11: Ka kynhun jong pharmacist jong ka Meghalaya ha ka sngi Thohdieng ki la dawa na ka sorkar jylla ban kyntiew ïa ki lad aikam aijam na ka bynta ki samla, kiba la pyndep ïa ki pharmacy course da kaba buh noh da ka Pharmaceutical Industry ha ka jylla.
Kane ka kynhun ka la aiti ruh ïa ka dorkhas lyngba ki dkhot jong ka kiba kynthup ïa u Bah E Syiemlieh, B Sumer, W Suting bad R Kshiar sha ka Myntri ka tnat ka Koit ka Khiah ka sorkar jylla ka kong Ampareen Lyngdoh ha kaba ki la kyrpad ïa ka jingtuklar jong ka, halor kane ka kam.
Haba ïathuh shaphang ki lad jingtip ba ki la ïoh lyngba ka RTI, kine ki pharmacist ki la ïathuh ba haduh mynta kam shym don shuh ka jingthungkam kaba la pynmih lyngba ki jingpynbna lyngba ka sorkar na ka bynta ki kam ba la mang ha ka Directorate of Health Services.
“Halor kane ngi kyrpad ïaphi ban khmih lem ïa kane ka jingeh ha kaba ïadei bad ka jingthungkam pharmacist, la ka dei ka sponsor bad non-sponsored candidate ba kin ïohlad ban ïakhun ïa kane ka kam,” ki la ong.
Halor ka jingdonkam ban pynbun ïa ki lad ïohkam ïohjam, kine ki pharmacist ki la ong, “Ngi kyrpad ïa ka sorkar ba kan kyntiew bad pynbun ki lad ïohkam ïohjam na ka bynta ki samla kiba la pyndep ïa ki course pharmacy da kaba buh ïa ka Pharmaceutical Industry ha ka jylla.”
Shuh shuh ki la ai jingmut ruh halor ka jingdonkam ban pynbun ïa ki nongtrei pharmacist khnang ban pynurlong ïa ka bha ka miat IPHS ha baroh ki lad ki lynti kum ha ki district hospital, CHC, PHC bad Sub-Centre nalor ka jingdonkam ban thung khambun ki drug inspector ha ki district jong ka jylla.
