Nongstoiñ, Ïaiong 11: Ka West Khasi Hills District, ka dei ka District kaba heh tam bad ka dei ruh ka District kaba ki surok kali kiba bha ki dang duna shaba palat, ha kaba ki paidbah, ki kynhun pahara shnong, ki seng samla shnong, ki seng longkmie bad ki rangbah shnong ki shem jingeh ban pynjan ïa ka jingïatreilang bad ki bor ka aiñ.
Haba phai ha ka jinglong jingman hapoh ka District ha kine ki sngi ki snem, la donkam ba ka sorkar kan buh shuh shuh ïa ki ktem pulit kiba thymmai, kum ha Maweit, Rambrai. Nalor kitei ki ktem, ka shnong Kyrshai ka dei ka shnong kaba donkam kyrkieh ïa ka ktem pulit kaba khlaiñ, namar ba ka dei ka shnong kaba don ha khappud bad ka Assam.
Ha Kyrshai ka dang don tang ka ktem pulit kaba shi por bad wat ka jaka sah ba thikna ruh kim pat don haduh mynta. Hynrei ki dang shu sah ha kawei ka ïing skul kaba rim kaba la ai jingbit da ka shnong. Nalor kata, ki pulit kiba don ha katei ka jaka ruh ki don tang kumba shiphew haduh khatar ngut eiei.
Shuh shuh, kum ban pynkynmaw ba ha ki snem ba la dep, na ka liang ki sengbhalang bad riew paidbah ki la dawa na ka sorkar ba kan buh noh da ka ktem pulit ha Rambrai, Maweit bad Nongshillong na ka bynta ka jingbit jingbiang jong ki paidbah. Hynrei haduh mynta kitei ki jingdawa kim shym pat la urlong satia.
Haba phai sha ki jingsniew ba bun jait, ym lah ban len ba ha kine ki sngi ka kam khaïi drok bad jingdih drok ka la kynrei haduh katta katta man ki jaka khamtam eh ha ki jaka sor. Hynrei, ki pulit hapdeng ka jingpyrshang na ka por sha ka por, pynban ki shem shitom ban ïakhun tyngeh namar ka jingkhia palat kiwei pat ki kam ha ka Headquarter jong ka District.
Nalor kata, ka jingduna ophisar hapoh Headquarter kaba don ha Nongstoiñ, ki pulit ophisar naduh ki kynthei bad shynrang ruh ki shem shitom bha, khamtam eh ba hap ban bishar bniah bha ïa ki mokotduma shuwa ban phah sha ka Kashari jong ka District.
Kumta lada ka sorkar ka sngew donkam ba ki paidbah ka District kin don ka shongsuk shong shngaiñ bad ka jingbit jingbiang ha baroh ki liang, ka la dei ban pynurlong ïa katei ka kam kaba dei kaba kongsan bad kaba donkam bha.
