Shillong, Ïaïong 11: U Symbud Myntri Rangbah ka jylla u ba khmih ïa ka tnat Home (Police) u Bah Prestone Tynsong ha ka sngi Thohdieng u la ong ba kam shym don kano kano ka jingsuba sniew ha kaba ïadei bad ka jingkhlad noh jong u nongshang kai pyrthei na ka ri Hungary ha kawei ka shnong ha East Khasi Hills district.
“Kam don satia ka jingsuba sniew ne leh bakla ha kaba ïadei bad kane ka jingjia. Shah ïa nga ban ong ba ka dei ka kam kaba ym poi pyrkhat ba ka la leit jia kane ha ka wah,” ong u Bah Tynsong sha ki lad pathai khubor.
Haba kylli u Bah Tynsong u la ong, “Ha ka jingshisha na ka por sha ka por ngi shait ong ïa kiba wan jngohkai kiba wan sha Meghalaya ym tang sha Sohra hynrei sha kiwei kiwei pat ki jaka ba kim dei ban leh shngaiñ. Phim lah ban lehkai ïa ka wah kaba don ha ki jaka rithor bad ki jaka lum naba ka long kaba ïapher. Kumta ngi kyrpad ïa ki ba kin long kiba husiar haba ki leit ban jngi bad leitkai sha ki jaka ba don ki wah.”
Lah ban pynkynmaw ba ka sngi Palei ki Pulit ki la lap ïa ka met ba la pyut jong u nong Hungary na Ryngku Ksang, kaba dang ha[ hapoh ka shnong Ramdait ka thaiñ Shella.
Ïa utei uba la wan jngohkai la ithuh kyrteng da u Zolt Puskas, bad la lap ha ka por 1:30 nohphai sngi.
La ïathuh ba u Puskas u la jah naduh ka 29 tarik u Lber, 2025, bad ka la don ruh ka jingleit ujor sha ki pulit ha ka 2 tarik u Ïaïong.
