Shillong, Naitung, 13: Ki nongïalam jong ka Khasi Students Union (KSU West bad South Khasi Hills District ha ka sngi Palei ki la aiti da ka jingthoh ha u Myntri ka tnat Sam Bording jong ka Jylla u Abu Taher Mondal halor ka jingdawa ïa ka Sorkar Jylla ba kan pynstet noh ban tei ïa ka shlem pynmih bording ha Wah Kynshi ïa kaba yn tip kum ka Kynshi Hydel Power Project (KHPP).
Ha ka dorkhas, ki nongïalam ka KSU ki la pyntip ba ki trai jaka ki ban shah ktah na kane ka projek ki angnud ba ka Sorkar Jylla lyngba ka Meghalaya Energy Corporation Limited (MeECL) kan tei noh mardor ïa kane ka shlem pynmih bording khnang ba kan weng ïa ka jingkyrduh bording ha ka jylla bad kan plie ruh ïa ki lad ïohkam ïohjam jong ki samla.
Kane ka jingdawa ka seng ka la long hadien ba ka Jylla Meghalaya ka la mad ïa ka jingpynlip bording da ki kynta. Nalor kata, ki shnong nongkyndong ki ju mad ïa ka jinglip bording kaba ju neh haduh 10 kynta ha ka shi sngi khamtam ha ki por ba tyrkhong ka bneng.
“Ka jingduna ki shlem pynmih bording ha ka jylla ka la buh jingeh haduh katta katta ïa ka MeECL ban sam khlem jingthud ïa ka bording sha ki nongshong shnong jong ka jylla. Dang shen ka la don ka jingtyrwa ban den ïa ka wah Kynshi na ka bynta ban pynmih bording kaba la shu iehnoh kumto na ki kattto katne ki daw. Katkum ka jingtip jong ka seng, ka jingpynmih bording na ka Kynshi Hydel Power Project kan long haduh 450 mega watt,” ong ka dorkhas na ka Seng.
Kum ban shu pyntip ka Sorkar ka la aiti ïa kane ka projek sha ka Athena Company ha u snem 2007.
