Nongpoh, Jymmang 16: Ki Dorbar Shnong jong ki shnong bapher bapher kiba don ha syndah jong ka Wah Khri haka thaiñ Western Ri-Bhoi ryngkat ka KSU Western Border Area bad ka River Protection Organization Warmawsaw kila lum syndon da ka jingïalang hadien ka jingshah pynïap dusmon jong ki dohkha ha Wah Khri ha kaba ka jingpynïap dusmon ïaki dohkha kala long kaba shyrkhei bad lah ruh ban wanrah ka jingduhjait ki dohkha ha katei ka wah.
Naka liang ki nongïalam shnong kila pyntip ruh ba ki Dorbar Shnong bad kumjuh ruh katei ka kynhun ïada ïaka Wah Khri kila buh ka jingmaham ïaki paidbah ba kim dei ban shoh kharu lane ban ber dawai ha katei ka wah, hynrei wat hapdeng ka jingpyrshah jong ki shnong, ki riew dusmon kila leit ban pyniap dusmon ïaki dohkha da kaba shoh kharu bad kumjuh ruh ban ber dawai bih.
