Nongstoiñ, Jymmang, 16: Ka jingksam marpoh khyndew jong ka Shree Shree Mining Corporation Limited ha Mawlangria kaba don hajan ka shnong Mawïawtep, ka la bteng beit, hynrei ka jingpyrshah ka jur bha na ki paitbah jong ki khyndai tylli ki shnong ha katei ka thaiñ ka dang neh bad ki la dawa ba dei ban sngeh noh shisyndon.
Hynrei na ka liang ki ar ngut ki rangbah kiba kam ba dei ma ki kiba pyntrei bad kiba la dep ïoh jingbit na ki baroh ki tnad sorkar kiba dei khmih ïa ka jingpyntrei ïa ki marpoh khyndew, kim shym la sngap ïa ka jingdawa jong ki nongsynshar shnong bad ki paitbah. Wat haduh ka sngi ba u Majistor ryngkat ki Ophisar pulit ki la leit haduh katei ka jaka ban jurip, ha kaba ki la lap ba ka don shisha ka jingpyntuid pathar ïa ka um kaba jaboh sha ki phang ba ki don ki tyllong umbam umdih, hynrei kitei ki rangbah ki dang pyneh bad pynksan ba ka jingpyntrei ka dei ban ïaid beit.
U bah S.Myrthong sordar jong ka shnong Mawthaw haba pyntip ha u nongthoh khubor, u la ong ba katei ka jingleh bym suidñiew jong ki, ïa ka jingdawa jong ki nongsynshar shnong bad ki paitbah ki khyndai tylli ki shnong, ka la nang pynbitar shuh shuh ym tang ïa kitei kiba pyntrei, hynrei wat ïa u Syiem ka hima Rambrai u ba la ai jingbit khlem da bishar bniah ïa ka jingdon jong ki tyllong umbam umdih hajan katei ka jaka.
U bah Myrthong u la ong ruh ba kumba ki la pynpaw hakhmat u majistor ha ka sngi ba ki leit jurip ha katei ka jaka, ba kin pyrshah beit bad kin ym ailad satia kin ym kynran dien hynrei kin ïeng skhem haduh ba kut. U la ong ruh ba ha ka 18 tarik kata ha ka sngi palei ban wan ki rangbah jong ki arphew tylli ki shnong, kin pynlong biang ïa ka jingïalang ha Mawthaw ban ïapyrkhat bad ïatai sani halor katei ka kam. Ha katei ka sngi kin sa shim syndon ïa ka rai da kano ka lynti kin ïaid.
U la ong ruh ba na ka liang jong ki sordar jong ki khyndai tylli ki shnong ki pynpaw ka jingsngewsih kaba khraw, halor ka jingong jong uwei u ophisar ba ka jingktah ïa ka umbam umdih, ka dei na ka jingpynjngut jong ki muid kiba bam phlang ha kawei ka pynthor shrah kaba don ha ka jaka ba ka tyllong um ka tuid.
U la ong ruh ba na ka liang ki sordar shnong bad ki paitbah ki pynrem jur halor katei ka jingkren jong u. Namar ba ki muid ki don ha katei ka jaka tang ha katei ka sngi ba leit ma ki, namar ha ka por ba ka jingksam marpoh khyndew kam pat sdang ym ju don satia ka jingmih khñiang jong ki khunlung khynnah. Hynrei naduh ba la sdang trei ïa katei ka jingksam marpoh khyndew, ki khunlung khynnah ki ïoh ïa ka jingpang at ki ngap, ring kyllut ki shkor bad ki rangbah kiba sum ki buit dait ka met ka phad.
Katei ka jingong jong utei u ophisar ka pynishai ba wat ki bor district ruh ki ïashah ïa kitei ki ba pyntrei. U la ong ba lada katei ka jingksam mar poh khyndew kan dang ïai bteng, na ka liang ki nongsynshar shnong ka thaiñ kin ym kitkhlieh lada jia ei ei, hynrei ka sorkar bad ki bor pynïaid District ki hap ban kit khlieh hi.
